Таҥара дьиэтэ

Соломон салайарын Таҥара алҕаабыта. Бу дойду норуоттара бары олус иллээхтик-­эйэлээхтик уонна байылыаттык олороллоро. Ол гынан баран Соломон биир улахан соруктааҕа — Таҥара дьиэтин тутуу.

Израиль дьоно Египеттэн тахсыбыттара түөрт сүүс аҕыс уон сыл ааспытын кэннэ, Таҥара дьиэтин тутан саҕалаабыттара. Тир уонна Сидон ыраахтааҕытын, аҕата Давид доҕорун, Хирамы кытта Соломон илии тутуспуттара. Хирам тутууга анаан сыаналаах мас уонна таас биэрэр, оттон Израиль ас-үөл өттүнэн хааччыйар гына сөбүлэспиттэрэ. Таҥара дьиэтэ сэттэ сыл устата тутуллубута. Бу тутуу Давид өлүөн иннинэ Соломоҥҥа биэрбит былаанынан оҥоһуллубута. Таҥара дьиэтэ тутуллар сирин — Мориа хайатын — эмиэ Давид ыйбыта. Бу сиргэ хаһан эрэ урут Авраам Таҥараҕа эрэлин көрдөрбүтэ, оттон Таҥара Исаак олоҕун быыһаабыта.

Таҥара дьиэтэ икки сүрүн чаастан турара: «Сибэтиэй» уонна «Сибэтиэйтэн сибэтиэй» диэн ааттаахтара. Ытык Хоппо турар Сибэтиэйтэн сибэтиэй өттө атын тутуулартан үрдүкү турара уонна Сибэтиэйтэн туһунан халыҥ хахханан араарыллара.

Сибэтиэйтэн сибэтиэй иһэ хараҥа буолуохтааҕа, ол иһин түннүктэрэ суоҕа. Библия бу сири «Таҥараны кытта кэпсэтэр сир» диэн ааттыыр, тоҕо диэтэххэ, онно көстүбэтинэн Таҥара Бэйэтэ баар буолар.

Таҥара дьиэтин тутуута түмүктэммитигэр өрөгөйдөөхтүк сырдаппыттара. Соломон Таҥара дьиэтигэр Айыы Тойон Ытык Хоппотун киллэрэригэр кырдьаҕастары, аҕа баһылыктары, Израиль норуоттарын тойотторун барыларын мунньубута. Аҕабыыттар Ытык Хоппону Сибэтиэйтэн сибэтиэйгэ аҕалбыттарыгар былыт аллара түһэн, Таҥара дьиэтин иһин барытын толорбута.

Айыы Тойон ыытыллыбыт үлэни сөбүлээбитин уонна Бэйэтэ Израиль норуотун кытта баарын ити курдук биллэрбитэ!

Билигин Соломон кини туттарбыт Таҥара дьиэтин Айыы Тойон сөбүлээбитин билбитэ.