Соломон муудараһы талар
Библия, III Саарыстыбалар кинигэ 2, 3 түһүмэхтэрэ
Давид ыраахтааҕы өлүөн иннинэ Иерусалимҥа Израиль норуотун бары тойотторун ыҥырбыта. Скиния оннугар улахан Таҥара дьиэтин тутар былааннаах эбитин иһитиннэрбитэ. Ол гынан баран Таҥара ону көҥүллээбэтэҕэ, тоҕо диэтэр Давид элбэхтэ сэриилэһэрэ.
– Таҥара дьиэтин мин уолум Соломон тутуоҕа, — диэбитэ Давид. — Өскөтүн Соломон Таҥара кэриэстэрин тутуһар буоллаҕына, Айыы Тойон кинини ыраахтааҕынан аныам уонна көмөлөһүөм диэн миэхэ эрэннэрбитэ.
Давид мустубут дьону Таҥара кэриэстэрин харыстыырга уонна Киниэхэ ис сүрэхтэн сулууспалыырга ыҥырбыта. Бары норуот кинээстэрэ, Давид уолаттара Соломоҥҥа, саҥа ыраахтааҕыга, бас бэринэллэрин айхаллаан туран эрэннэрбиттэрэ.
Таҥара Соломону алҕаабыта, онон кини модун кыахтаах ыраахтааҕы буолбута. Бас бэринээччилэрэ эрэ буолбакка, тулалыыр норуоттар бары Соломону таптыыллара уонна киниэхэ сүгүрүйэллэрэ.
Соломон ыраахтааҕы солотугар киириэн иннинэ дириҥник бас бэринэр Таҥаратыгар махтанар сүрэҕиттэн сиэртибэ биэрбитэ. Түүн Таҥара эдэр ыраахтааҕыга түүлүгэр киирэн эппитэ:
– Миигиттэн тугу баҕараргын көрдөө.
Соломон эппитэ:
– Эн мин аҕабар мэлдьи өйөбүл буоларыҥ. Кини кэнниттэн миигин ыраахтааҕынан туруордуҥ. Ол эрээри мин эдэрбин уонна ыраахтааҕылыырга үөрүйэҕэ суохпун, ол иһин Эйигиттэн көрдөһөбүн: Бэйэҥ кулуккар Эн норуоккун дьүүллүүрбэр уонна үтүөнү-мөкүнү араарарбар муударай сүрэхтэ бэлэхтээ; эбэтэр ким Эн элбэх ахсааннаах норуоккун салайар кыахтааҕый?
Таҥара киниэхэ хардарбыта:
– Эн баайы-дуолу, уһун олоҕу буолбакка, муудараһы көрдөспүтүҥ иһин, Мин эн баҕаҕын толоруом. Ону таһынан, Мин эйиэхэ урукку өттүгэр ханнык да ыраахтааҕыга суох уонна инникитин даҕаны суох буолар баайы-дуолу уонна албан ааты биэриэҕим. Өскөтүн эн аҕаҥ Давид курдук Мин устааптарбын уонна кэриэстэрбин тутуһар, харыстыыр буоллаххына, үйэҕин да уһатыаҕым.
Соломон уһуктан баран, Айыы Тойоҥҥо түүлүн иһин махтаммыта.
Биир күн ыраахтааҕыга кыһыл оҕолоох икки дьахтар кэлбитэ, киниттэн мөккүөрдэрин быһаарарыгар кинилэр көрдөспүттэрэ. Биирдэстэрэ кэпсээбитэ:
– Биһиги биир дьиэҕэ олоробут, иккиэн биир кэмҥэ уол оҕолору төрөппүппүт. Биир түүн бу дьахтар уола өлөн хаалбыта. Кини ону билэн баран, мин утуйа сыттахпына, уолбун бэйэтигэр ылбыт, миэхэ бэйэтин өлбүт уолун ууран кэбиспит.
Онуоха биирэ хардарбыта:
– Суох, мин уолум тыыннаах, эн уолуҥ өлбүтэ.
Ити курдук дьахталлар ыраахтааҕы иннигэр бэйэ-бэйэлэрин кытта мөккүһэ турбуттара.
Маны быһаарар ыарахан этэ, бары ыраахтааҕы туох диирин кэтэспиттэрэ. Соломон кулутугар соруйбута:
– Батаскын аҕалан бу оҕону икки гына аҥардаан кэбис уонна оҕо аҥарын биир дьахтарга, иккис аҥаарын атыныгар биэртэлээ!
Онуоха уола тыыннаах дьахтар хаһыытыы түспүтэ:
– Оо, тойонуом! Оҕону тыыннаахтыы киниэхэ биэр! Өлөртөрүмэ, тыыннаах эрэ хааллын!
Оттон биирдэстэрэ эппитэ:
– Аҥаардааҥ, итинник буолар буоллаҕына хайабытыгар да тиксибэтин!
Ити курдук ыраахтааҕы хайалара оҕо дьиҥнээх ийэтэ буоларын билбитэ. Оҕону ийэтигэр биэрбиттэрэ.
Израиль дьоно-сэргэтэ бүтүннүү ыраахтааҕы хайдах курдук мындырдык быһаарбытын истибиттэрэ уонна кинини өссө ордук ытыктыыр буолбуттара, тоҕо диэтэр, кини Таҥараттан муудараһы ылан, сөптөөх дьүүлү оҥорорун өйдөөбүттэрэ.
Ыйытыктар:
1) Тоҕо Таҥара Давид Киниэхэ дьиэ тутан биэрэрин баҕарбат этэй?
2) Соломон Таҥараттан тугу көрдөспүтүй?
3) Соломон хайдах гынан дьахталлар мөккүөрдэрин быһаарбытый?