Сион хайатын үрдүгэр Ытык Хоппо
Библия, II Саарыстыбалар кинигэ 5:7-11 түһүмэҕэ уонна I Паралипоменон кинигэ 13, 15, 16 түһүмэхтэрэ
Таҥара эрэннэрбитин курдук, Давид ыраахтааҕы буолбута. Кини Вифлеемҥэ төрөөбүтэ, онно хойдору маныыра, оттон ыраахтааҕы буолан баран, Иерусалимҥа олохсуйбута.
Иерусалим ураты кэрэ куорат этэ. Хас да томторго турара, онтон биирдэстэрэ Сион хайата диэн ааттанара. Бу хайа үрдүгэр Давид дыбарыаһын туттубута. Кини Таҥараны олус таптыыр буолан, Ытык Хоппо куруутун аттыгар баар буолуон баҕарара. Дьэ, Давид ону аҕала барар түгэнэ үүммүтэ.
Давиды элбэх аҕабыыт арыаллаан испитэ. Норуот эмиэ ыраахтааҕыны батыһара, араас музыкальнай инструменнарга оонньуура: арфа, турба, флейта, цимбала уонна саалтыыр. Ол тыаһа Таҥараны айхаллыыр ырыанан доҕуһуолланара. Давид кинилэри кытта бииргэ хааман иһэн эмиэ арфаҕа оонньуура. Кэннилэригэр аҕабыыттар Ытык Хоппону көтөҕөн иһэллэрэ.
Ити хайдахтаах курдук кэрэ көстүү этэй, Таҥараны айхаллааһыннара истэргэ хайдах курдук үчүгэйэй! Элбэх киһи маны көрөөрү тахсара, кинилэр Давид арфаҕа оонньоон, Таҥараны айхаллыырын истэллэрэ. Давид бу күн олус да дьолломмута!
Ытык Хоппону Сион хайа үрдүгэр таһаарыахтаахтара. Хайа чыпчаала бөҕө истиэнэнэн төгүрүтүллүбүт этэ, киирэр ааннааҕа. Өрөгөйдөөх арыаллааһын чугаһаабытыгар, ыраахтааҕыны уонна Ытык Хоппону киллэрээри улахан ааннарын тэлэччи аспыттара. Давид эрдэттэн Ытык Хоппону туруорарга аналлаах сири бэлэмнэттэрбитэ. Онно сабыылаах Ытык Хоппону аҕалан туруобуттара. Ырыаһыттар «Таҥараны айхаллааҥ!» диэн хаһан эрэ Давид суруйбут ырыатын өрөгөйдөөхтүк ыллаабыттара. Бу күн Сион хайатыгар ыраахтааҕы Таҥараҕа сиэртибэлэри биэрбитэ уонна Израиль норуотун алҕаабыта.
Давид Таҥара Ытык Хоппото билигин дыбарыас аттыгар баар буолбутуттан олус үөрэрэ. Күн ахсын ырыаһыттар Ытык Хоппо иннигэр өрөгөй гимнэрин оонньууллара уонна ыллыыллара.
Давид ыраахтааҕы дыбарыаһыгар куруутун баар буолбат этэ, субу-субу филистимляниннары уонна Израиль атын да өстөөхтөрүн утары сэриилэһэригэр тиийэрэ. Таҥара хас сырыы ахсын Давикка уонна кини дьонугар кыайыыны биэрдэҕин ахсын, Давид кыайыыларын иһин Таҥараны айхаллыы уонна махтана Сион хайатыгар төннөрө.
Ыйытыктар:
1) Ханнык куоракка Давид саарыстыбата баарый?
2) Давид Ытык Хоппону аҕаларыгар үөрүүтүн хайдах биллэрбитий?