Итэҕэл кыайыыта

Самуил кэлэн барбытын да кэннэ Давид хойдорун маныырын кубулуппатаҕа. Кини хойдорун мэччитэригэр гуслятын үксүгэр илдьэ сылдьара. Мэччийэр кэмнэригэр Давид, күлүккэ олорон, гусляҕа оонньуура уонна саҥа ырыалары таһаарара. Ол эрээри сороҕор араас түгэн буолара, биир күн маныыһыт хойдорун эһэттэн быыһаабыта.

— Таҥара миигин кытта мин хойдорбор сыһыаннаһарым курдук сыһыаннаһар, — диэн толкуйдаабыта Давид, биир хойун оҕотун сүтэрэ сыһан баран. — Миэхэ куттал суоһаатаҕына, Таҥара миигин араҥаччылыыр, мин туспар кыһаллар уонна көмүскүүр.

Давид гуслятын ылбыта, струналарын тыҥкынатан толкуйдуу түспүтэ уонна ыллаан барбыта:

— Айыы Тойон — мин Маныыһытым, тугунан да мин тутайыам суоҕа. Кини өҥ мэччирэҥҥэ миигин сынньатар, чуумпу уулаах сиргэ сирдээн илдьэр. Кини куппун-­сүрбүн бөҕөргөтөр, Бэйэтин аатын туһугар кырдьык ыллыгар салайар. Өлүү күлүгэ түспүт толоонунан да бардахпына, мин хара дьайтан куттаныам суоҕа — Эн миигинниин бииргэҕин, Эн тайах маһыҥ уонна сүллүгэһиҥ миигин уоскуталлар.

Саул ыраахтааҕы соһуччу уордайан-­киҥнэн кэлэрэ, онтуттан олус эрэйдэнэр, кэмсинэр уонна муҥура суох санааргыыр этэ. Биирдэ кини эмиэ күүскэ кыйаханан, тулалыыр дьонун куттаабыта. Саул биир кулута гусляҕа үчүгэйдик оонньуур Давиды ыҥырыахха диэн өй укпута. Кини гусляҕа оонньуура ыраахтааҕыны уоскутуохтааҕа. Ити курдук Давид ыраахтааҕы дыбарыаһыгар сулууспалыыр буолбута. Өскөтүн Саул кини иннигэр Самуил ыраахтааҕылыырга арыынан аҕаабыт киһитэ олорорун билэрэ эбитэ буоллар! Ол гынан баран кини ону сэрэйбэт да этэ, сотору эдэр Давиды ис сүрэҕиттэн таптаабыта. Кини гусляҕа оонньуура, кырдьык даҕаны, Саул дууһатын уоскутара.

Саул филистимляннары утары сэриигэ туруммутугар Давид дьиэтигэр төннүбүтэ. Сэрии кэмигэр эдэр гусляр кимиэхэ наада буолуой? Онон Давид аҕатын хойдорун уруккутун курдук маныыр буолбута, оттон убайдара Саулу кытта сэриилэһэ барбыттара.

Биирдэ аҕата Давиды ыҥыран ылан эппитэ:

— Сэрии буола турар хонуутугар тиийэҥҥин убайдаргар аста илдьэн биэр.

Аҕыйах чааһынан Давид сэрии хонуутугар тиийэн кэлбитэ. Кини убайдарыгар өйүө ас аҕалан биэрбитэ уонна кинилэр аһыыр кэмнэригэр, аттыларыгар олорон, сэрии туһунан кэпсэтэллэрин истибитэ. Эмискэ бары ах барбыттара уонна тыҥааһыннаахтык ырааҕы одуулаабыттара. Биир филистимлянин Израиль сэриитигэр чугаһаан иһэрэ. Оо, туох үлүгэр сүрдээх сэрииһитий? Бөҕө-таҕа көрүҥнээх, быыппастар быччыҥнаах, үс миэтэрэ кэриэтэ үрдүк уҥуохтаах! Кини аата Голиаф диэн этэ. Ыарахан сэбин-­сэбиргэлин кэтэн, илиитигэр сүдү үҥүүнү тутан турара.

— Этиибин өссө биирдэ хатылыыбын! — диэн хаһыытаабыта кини. — Миэхэ биир киһитэ таһаарыҥ, биһиги кинилиин иккиэн эрэ киирсиэхпит. Өскөтүн кини миигин кыайдаҕына — кыайыы эһиэнэ буолуоҕа, оттон өскөтүн мин кыайдахпына — биһиги кыайыылаах тахсыахпыт. Тугуй, куттанныгыт дуо, кус сүрэхтэр?

— Кини эһигини урукку өттүгэр охсуһууга ыҥырбыта дуо? — Давид убайдарыттан ыйыппыта.

— Хаһыс да сырыытын ыҥырар. Биллэн турар, ким да сөбүлэспэт. Итинник аарыма киһини кытта киирсии — көстөн турар өлүүгэ барыы буоллаҕа!

— Оттон Таҥара биһиги диэки эбээт! — Давид соһуйбута.

Сэрииһиттэр күлбүттэрэ.

— Ол Таҥараҕа туох сыһыаннаах буолуой? Дьыала күүскэ, сымсаҕа уонна үчүгэй сэпкэ-­сэбиргэлгэ сытар. Саул ыраахтааҕы оннооҕор кыыһын Голиабы кыайбыт буойуҥҥа ойох биэриэх буолан эрэннэрбитэ. Ол үрдүнэн ким да киниэхэ утары тахсыан баҕарбат.

Гусляҕа оонньообут эдэр Давид сэрииһиттэргэ кэлбитин туһунан Саулга кэпсээбиттэрэ. Ону истэн Саул кинини бэйэтигэр ыҥырбыта.

— Мин филистимлянины кытта киирсэрбин көҥүллээ, — диэн көрдөспүтэ Давид.

— Сананыма даҕаны! — диэбитэ ыраахтааҕы. — Эн өссө олус эдэргин, оттон Голиаф модун күүстээх уонна кыргыһарга үөрүйэх сэрииһит.

— Эһэ да, хахай да үөрбүттэн хой оҕотун уораары гыннахтарына, мин кинилэри кыайааччыбын. Өскөтүн Таҥара онно көмөлөспүт буоллаҕына, бу да сырыыга, филистимлянины кытта киирсэрбэр, Кини көмөлөһүөҕэ, — диэн эрдэҕэс уол хорсуннук хардарбыта.

— Эн итэҕэлгин сөҕөбүн эрэ, — диэбитэ Саул. — Эйигиттэн ураты ким даҕаны сөбүлэспэт… Мин сэппин-­сэбиргэлбин ыл уонна киирис. Таҥара эйигинниин буоллун!

Давид Саул сэбин-­сэбиргэлин кэтэн көрбүтэ да, онто олус ыарахан буолан, хамсыырыгар да мэһэйдиирэ. Давид сонно устан кэбиспитэ, тааһы быраҕар быатын (пращаны) ылбыта, биэс бөкүнүк тааһы булбута уонна мас тайаҕын ылан филистимляниҥҥа утары барбыта.

— Һа-һа-һа! — Голиаф киниэхэ быалаах эрэ утары кэлэн иһэр эдэр уолу көрөн, сэнээн күлбүтэ. — Бу эн миигин кытта киирсээри гынаҕын дуо?

— Эн мин утары куйахтаах уонна үҥүүлээх таҕыстыҥ, оттон мин эн утары Израиль сэриитин Таҥарата Айыы Тойон аатын ааттаабытынан таҕыстым! — диэн хаһыытаабыта Давид.

Кини тааһы быатыгар укпута уонна эргитэн-­эргитэн баран филистимляниҥҥа бырахпыта. Таас аарыма улахан киһи аһаҕас сүүһүгэр чопчу тиийэн түспүтэ. Голиаф сиргэ охтон күр гыммыта. Давид киниэхэ сүүрэн тиийбитэ уонна батаһын сулбу тардан ылан, кинини курдат анньыбыта. Ону көрөн турбут Израиль дьоно, Давид кыайыытыттан санаалара көтөҕүллэн, туохтан да чаҕыйбакка филистимляниннары бэйэлэрин сирдэриттэн үүрбүттэрэ.