Эдэр маныыһыт

Вифлеем ол саҕана айанньыт сылдьыбат кэриэтэ кыра дэриэбинэ этэ. Ол да буоллар, Таҥара Самуилы онно биир дьиэ кэргэҥҥэ ыалдьыттата ыыппыта. Ити дьиэ кэргэн уолаттарыттан биирдэстэрэ Израиль ыраахтааҕыта буолуохтааҕа. Дьиэ кэргэн аҕа баһылыгар Иессейгэ Самуил пророк бэйэтинэн ыалдьыттыы кэлбитэ улахан чиэс этэ. Иессей Самуилы кинилэри кытта эбиэттииригэр ыҥырбыта. Тардыллан турар остуолга олорон Иессей уолаттарын кытта билсиһиннэрэн барбыта.

— Бу мин улахан уолум, — Иессей киэн туттан эппитэ.

«Кини билиҥҥиттэн ыраахтааҕыга маарынныыр эбит, — дии санаабыта Самуил. — Эмиэ Саул курдук үрдүк, көнө уҥуохтаах, кэрэ көрүҥнээх. Мин ыраахтааҕы буоларыгар алгыырбар Саул эмиэ маннык этэ».

Ол эрээри Самуил Таҥара саҥатын истибитэ:

— Кини тас көрүҥүн уонна уһун уҥуоҕун көрүмэ! Киһи тас көрүҥүн көрөр, оттон Таҥара сүрэҕин көрөр. Кини ыраахтааҕы буолуо суохтаах.

Ити курдук Иессей бэйэтин сэттэ уолун биир-биир билсиһиннэрбитэ даҕаны, Таҥара: «Кини буолбатах!», — диэн испитэ.

— Чэ, билигин баран аһыаҕыҥ, — диэн Иессей остуолга ыҥырбыта.

— Тохтоо эрэ, эн уолаттаргын барыларын кытта миигин билиһиннэрдиҥ дуо? — ыйыппыта Самуил.

— Өссө биир кыра уоллаахпын. Кини хонууга хойдору маныы сылдьар.

— Кинини ыҥыра оҕус! — диэбитэ Самуил.

Сотору кэминэн эрдэҕэс уол Давид Самуил иннигэр кэлэн турбута. Кини сырдык баттахтааҕа, кыраһыабай харахтааҕа уонна ис киирбэх сэбэрэлээҕэ.

Таҥара Самуилга эппитэ:

— Бу уолу алҕаа, кини ыраахтааҕы буолуоҕа.

Самуил елей арыынан эрдэҕэс уол сүүһүн сотон баран эппитэ:

— Эйигин Таҥара Албан Аатын туһугар Израиль норуотун ыраахтааҕыта буоларгар арыынан оҕунуохтуубун. Таҥара алҕаатын, эйигин!

Субу түгэҥҥэ Айыы Тыын Давикка киирбитэ.

Иессей атын уолаттарын кытта соһуйан ах баран хаалбыттара, оттон Давид туох буола турарын ситэри өйдөөбөтөҕө.

Ыйытыктар:

1) Таҥара Самуилга туох сорудаҕы биэрбитий?

2) Иессей хас уоллааҕый?

3) Ыраахтааҕы буоларга кими оҕунуохтаабыттарый?