Израиль ыраахтааҕыны ирдиир
Библия, I Саарыстыбалар кинигэ 8, 9, 10 түһүмэхтэрэ
Самуил бүдүгүрэ кырдьыбыта. Таҥара өр сылларга кини нөҥүө Израиль норуотун салайбыта. Самуил мөккүөрү быһаарар судьуйа уонна дьону Таҥараҕа бэриниилээх буоларга ыҥырар пророк этэ. Ол гынан баран, Израиль дьоно судьуйалаах буолбакка, атын норуоттар курдук бэйэлэрэ ыраахтааҕылаах буолуохтарын баҕарбыттара.
Кинилэр Самуилга тиийэн эппиттэрэ:
– Биһиги үрдүбүтүнэн ыраахтааҕыта туруор!
Ону истэн Самуил олус хомойбута уонна ол туһугар Таҥараҕа үҥэн барбыта. Онуоха Таҥара эппиэттээбитэ:
– Норуот этэрин иһит... кинилэр эйигин буолбакка, Миигин туораттыллар. Мин ыраахтааҕылыырбын кинилэр баҕарбаттар.
Самуил Израиль дьонун барытын мунньан эппитэ:
– Таҥара эһиэхэ ыраахтааҕыны биэриэҕэ, оттон эһиги манныкка бэлэм буолуҥ: уолаттаргыт кини сэрииһиттэрэ буолуохтара, сорохторо кини колесницатын ыҥыыр аттаах сылдьан арыаллыахтара. Сорох хаалбыттар сэрии сэбин уонна колесницаҕа туттуллар тэриллэри оҥоруохтара, оттон атыттара – кини сирин хорутуохтара уонна үүнүүтүн хомуйан биэриэхтэрэ.
Оттон кыргыттаргыт киниэхэ ас астыахтара, килиэп буһарыахтара.
Кини үүнүүлээх виноградниктаргытын, хонууларгытын уонна саадтаргытын былдьаан, бэйэтин чугас дьонугар түҥэтиэҕэ, оттон үүнүүгүт уон гыммыт биирин тутан ылан, бэйэтин кулуттарыгар биэриэҕэ.
Эһиги бастыҥ кулуттаргыт киниэхэ үлэлиир буолуохтара.
Дьэ, оччоҕуна ыраахтааҕыламмыккытын кэмсиниэххит уонна төһө да өрүһүлтэ Таҥараттан көрдөспүккүт иһин, Кини аны эһиэхэ көмөлөһүө суоҕа.
Ол да үрдүнэн дьон Самуил сэрэтиитин истибэтэҕэ:
– Биһиги син биир ыраахтааҕылаах буолуохпутун баҕарабыт!
Таҥара кинилэргэ ыраахтааҕынан Саулу туруортарбыта. Саул эдэр, кыраһыабай дьүһүннээх уонна барыларыттан үрдүк уҥуохтаах этэ. Израиль дьоно ыраахтааҕыларын үөрэ-көтө көрсүбүттэрэ:
– Ыраахтааҕыбытыгар уруй-айхал! – уруйдаабыттара-айхаллаабыттара.
Ол эрээри Саул үчүгэй ыраахтааҕы буолбатаҕа. Кини Таҥара кэриэстэрин тутуспакка, бэйэтэ билэринэн дьаһайара. Ол иһин Таҥара салгыы Саул удьуора Израиль норуотун ыраахтааҕыта буолуон баҕарбат этэ.
Саул өссө ыраахтааҕылыы олордоҕуна, кини өлбүтүн кэннэ Израиль норуотун салайарга анаммыт эдэр киһини Таҥара талбыта.
Ыйытыктар:
1) Самуил норуокка киминэн анаммытый? Кини эбээһинэһэ тугуй?
2) Тоҕо норуот ыраахтааҕылаах буолуон баҕарбытый?
3) Ону Таҥара туох диэбитий?