Иорданы туорааһын
Библия, Иисус Навин кинигэтин 3, 4 түһүмэхтэрэ
Сарсыарда эрдэ Иисус Навин Израиль норуотун кытта Иордан өрүскэ барбыттара. Кытылга отууларын туруортаан баран, өрүһү туоруурга бэлэмнэммиттэрэ. Иисус норуотун, бастатан туран, ыраастаналларыгар соруйбута, тоҕо диэтэр, Айыы Тойон кинилэргэ дьиктини көрдөрүөн баҕарара.
Сарсыныгар Айыы Тойон Иисуска эппитэ:
— Бүгүн мин Моисейга курдук эйиэхэ көмөлөһөрбүн норуокка көрдөрүөм. Аҕабыыттарга этээр: Кэс Тыл Хоппотун илдьэ Иордан уутугар киирдилэр да, тохтоотуннар!
Иисус аҕабыыттарга Кэс Тыл Хоппотун ылан, норуот иннигэр баралларыгар соруйбута. Оттон норуокка эппитэ:
— Бүгүн Айыы Тойон дьиктитин көрүөххүт уонна Тыыннаах Таҥара эһигини кытта баарын билиэххит! Иорданы туоруурга Кэс Тыл Хоппото эһиги иннигитигэр барыаҕа. Хас биирдии биистэн биирдии киһитэ талыҥ, кинилэр ураты соругу сүгүөхтэрэ!.. Кэс Тыл Хоппотун илдьэ иһэр аҕабыыттар Иордан уутугар киирдэхтэринэ, уу икки гына арахсыаҕа: биир өттүгэр уу мунньуллан эркин курдук туруоҕа, оттон иккис өттө сүүрүгүрэ сытыаҕа.
Кэс Тыл Хоппотун илдьэ иһэр аҕабыыттар ууга киирээттэрин кытта, үөһэттэн сүүрүгүрэр уу тохтоон хаалбыта. Өрүс биир өттүгэр улахан уу эркин үөскээбитэ. Атын өттүттэн уу быстан, кураанах сир тахсыар диэри сүүрүгүрэрин тохтоппотоҕо. Киэҥ, кураанах суол тахсыбытынан аҕабыыттар Кэс Тыл Хоппотун өрүс ортотугар аҕалан баран тохтообуттара. Израиль дьоно бары Хоппо аттынан кураанах сиринэн ааһан, Иордан анараа кытылыгар тахсыбыттара.
Уон икки биистэн биирдии эр киһи өрүс түгэҕиттэн, аҕабыыттар турбут сирдэриттэн, биирдии тааһы ылан норуот хонуохтаах сиригэр илдьэллэригэр Айыы Тойон соруйбута. Уон икки атын таастан Иисус Навин Иордан түгэҕэр, аҕабыыттар Кэс Тыл Хоппотун тутан турбут сирдэригэр, мэҥэ бэлиэни туруорбута.
Норуот Иордан утары кытылыгар тиийбитэ, кэннилэриттэн Кэс Тыл Хоппотун илдьэ аҕабыыттар тахсыбыттара. Кинилэр тиийээттэрин кытта сонно тута уу оннугар түһэн, кытылларын толоро‑толоро, уруккутун курдук сүүрүгүрэн барбыта. Айыы Тойон бу дьиктитин көрөн өмүттүбүт норуот Иерихон куорат илин өттүгэр Галгалга отууларын туруорбута. Онно Иисус Навин уон икки эр киһи ууттан таһаарбыт таастарын биир сиргэ чөмөхтөөн баран норуокка эппитэ:
— Эһиги уолаттаргыт: «Бу туох суолталаах таастарый?», — диэн ыйыттахтарына: «Манна Кэс Тыл Хоппотун иннигэр Иордан уута икки аҥы силэллибитэ», — диэн хардарар буолаарыҥ. Онон, Айыы Тойон күүһүн-кыаҕын сир үрдүгэр бары норуоттар билэллэрин туһугар бу таастар үйэлэр тухары Израильга өйдөбүнньүк буолан сыттыннар! Уонна эһиги Айыы Тойон Таҥараттан олоххут тухары толлоргут туһугар!
Ыйытыктар:
1) Норуот иннигэр Кэс Тыл Хоппотун илдьэ кимнээх
барыахтаахтарый?
2) Иордан уута хайаабытый?
3) Туох мэҥэ бэлиэ Иордан кытылыгар туруоруллубутуй?
Өйдөбүнньүк туох суолталааҕый?