Күн уонна ый тохтууллар

Ханаан ыраахтааҕылара Иерихоҥҥа туох буолбутун истибиттэрэ уонна холбоһон, Иисус Навин уонна Израиль норуотун утары турарга санаммыттара. Оттон Гаваон куорат олохтоохторо Израиль дьонун диэки буолбуттара. Ону истэн, биэс ыраахтааҕы куораты сэрииһиттэринэн төгүрүйбүтэ.

Куорат олохтоохторо Иисус Навинтан көмө көрдөөбүттэрэ, ол иһин кини куомуннаахтарын өстөөхтөрүн утары элбэх ахсааннаах сэриитин көмөҕө ыыппыта. Олус түргэнник Ханаан ыраахтааҕыларын холбоһуктаах сэриитэ куоталларыгар эрэ тиийбитэ.

Бу сырыыга Айыы Тойон эмиэ Бэйэтин норуотун туһугар сэриилэспитэ: халлаантан өстөөх армиятыгар таас тобурах түспүтэ. Халлаан хараҥаран барбытыгар, оттон өстөөх өссө кыайтара илигинэ, Иисус Навин күүскэ үҥпүтэ:

— Күн, Гаваон үрдүнэн, оттон эн, ый — Аиалон дуолун үрдүнэн тохтоон туруҥ!

Ити көрдөһүүнү Айыы Тойон истибитэ. Израиль норуота өстөөхтөрүн букатыннаахтык кыайыар диэри күн уһаабыта. Итинник көстүү аны хаһан да буолбатаҕа. Бу сэриилээһин кэмигэр Иисус Навин сэриитинээн атын куораттары эмиэ баһылаабыттара, тоҕо диэтэр, Айыы Тойон Бэйэтин норуотугар көмөлөһөрө.