Раав уонна чуҥнааччылар
Библия, Иисус Навин кинигэтин 1, 2 түһүмэхтэрэ
Моисей өлбүтүн кэннэ Иисус Навин Израиль норуотун эрэннэриллибит сири баһылыырыгар бэлэмнээбитэ. Таҥара өскөтүн Иисус Навин Айыы Тойон кэриэстэрин толорор уонна Киниэхэ бас бэринэр буоллаҕына, көмөлөһөргө эрэннэрбитэ.
— Чиҥ уонна эр санаалаах буол, — диэбитэ Кини Иисуска. — Айыы Тойон Таҥараҥ эн ханна да буолларгын эйигин кытта буолуоҕа!
Иисус норуотун үс күннээх айаҥҥа тиийэр өйүөлэрин бэлэмнииллэригэр соруйбута, тоҕо диэтэр, кинилэр Иордан өрүс нөҥүө барыахтаахтара. Бу сири Таҥара кинилэргэ биэриэм диэн эрэннэрбитэ, ол иһин эрэннэриллибит сир диэн ааттанара.
Иисус Навин сэрэх киһи этэ. Кини бастаан икки чуҥнааччыны ыытарга санаммыта, кинилэр ол сиргэ тиийэн, чуолаан Иерихон куораты билэн-көрөн кэлиэхтээхтэрэ. Эдэр уолаттар куоракка киирэн Раав диэн дьахтар дьиэтигэр хонордуу тохтообуттара. Кини дьиэтэ куорат истиэнэтин иһигэр баара.
Иерихон ыраахтааҕыта кулуттарыттан ону истэн, Израиль дьонун тутан хаайарга соруйбута. Ол гынан баран Раав кинилэри дьиэтин үрдүгэр кистээн баран, ыраахтааҕы кулуттарыгар эппитэ:
— Миэхэ ханнык эрэ билбэт дьонум кэлэ сылдьыбыттара. Халлаан хараҥарбытын кэннэ барбыттара. Эккирэтиҥ, ситиэххит дии саныыбын.
Ыраахтааҕы кулуттара Израиль дьонун эккирэппиттэрэ. Раав ыалдьыттарыгар тахсан эппитэ:
— Бу сири Таҥара эһиэхэ биэрбитин билэбин. Иерихон олохтоохторо бары эһигиттэн куттаналлар. Айыы Тойон Египеттэн босхолоноргутугар хайдахтаах курдук дьиктилэри оҥорбутун, эһиги иннигитигэр Кыһыл байҕал уута икки аҥыы силэллэн биэрбитин истибиппит. Биһиги олус дьулайабыт, тоҕо диэтэргит, эһиги Таҥараҕыт халлааны уонна сири бүтүннүү бас билэр Айыы Тойон буолар. Мин эһиэхэ үтүөнү оҥордум, онон миигин уонна дьиэ кэргэммин өлүүттэн быыһыахпыт диэн эрэннэриҥ, тылбытын тутуһуохпут диэн туох эмэ бэлиэтэ хаалларыҥ.
Чуҥнааччылар Раавка кинини уонна дьиэ кэргэнин быыһыахпыт диэн эрэннэрбиттэрэ. Ол кэннэ Раав түннүгүнэн быанан түһэн куоталларыгар кинилэргэ көмөлөспүтэ. Израиль уолаттара бараары туран Раавка түспүт түннүктэригэр кыһыл быаны баайарыгар соруйбуттара. Бу кини дьиэ кэргэниниин быыһанар бэлиэлэрэ буолуохтааҕа. Ол кэнниттэн эдэр уолаттар куораттан барбыттара.
Кинилэр этэҥҥэ төннөн кэлэн, туох буолбутун Иисуска кэпсээбиттэрэ уонна түмүктэригэр эппиттэрэ:
— Айыы Тойон ити сири биһиэхэ анаабыт, онон куорат бары олохтоохторо биһигиттэн куттанан титирэстиир эбиттэр.
Ыйытыктар:
1) Айыы Тойон Иисуска тугу эрэннэрбитий?
2) Иисус Ханаан сиригэр киириэн иннинэ хайаабытый?
3) Чуҥнааччылар хайдах быыһаммыттарый?