Иерихону сэриилээн ылыы

Иерихон олохтоохторо Израиль дьонуттан куттанан, куоракка киирэр ааннарын саппыттара. Ол кэннэ ким да тахсыбат даҕаны, киирбэт даҕаны этэ.

Айыы Тойон Иисус Навиҥҥа эппитэ:

— Мин Иерихону, ыраахтааҕыны уонна кини сэриитин ылыыны эн илиигэр туттарабын. Сэрииһиттэриҥ алта күн устата куораты тула эргийдиннэр. Кинилэри кытта Кэс Тыл Хоппотун иннигэр сэттэ аҕабыыт сэттэ турбаны тутан истиннэр. Оттон сэттис күҥҥэ куораты тула сэттэтэ эргийээриҥ, аҕабыыттар турбаларын тыаһаттыннар. Бу кэм устата ким даҕаны биир да тылы саҥарыа суохтаах, эн хамаандаҥ эрэ кэнниттэн норуот күргүөмүнэн күүстээх куолаһынан хаһыытаатаҕына, куорат эркинэ төрдүгэр тиийэ сууллан түһүө. Ол кэннэ сэрииһиттэр куоракка бары өттүттэн саба түстүннэр.

Иисус Навин Таҥара бары дьаһалын аҕабыыттарга уонна сэрииһиттэргэ тиэрдибитэ. Уонна өссө Иерихоҥҥа баар үрүҥ, кыһыл көмүс бүтүннүүтэ, алтан, тимир мал барыта Айыы Тойоҥҥо ананарын эппитэ. Иерихонтан тугу да бэйэҕитигэр ылбаккыт, ылбыт киһи накаастабыла — өлүү буолуо диэн норуоту Иисус сэрэппитэ.

Айыы Тойон эппитин барытын лоп курдук толорбуттара.

Израиль сэриитэ куораты эргийэргэ туруммута. Инники сэттэ турбалаах, ол кэннэ Кэс Тыл Хопполоох аҕабыыттар барбыттара, кинилэр кэннилэриттэн турбаларын тыаһаппытынан Израиль дьоно испиттэрэ. Иисус хамаанда биэриэн иннинэ ким да саҥарыа суохтааҕын сэрэппитэ.

Алта күн устата күҥҥэ биирдэ бары саҥата суох куораты эргийэ хаампыттара. Сэттис күннэригэр сарсыарда эрдэттэн Иерихону эргийэллэрин саҕалаабыттара, бу сырыыга аҕабыыттар эрэ турбаларын үрбүттэрэ. Куораты сэттиһин эргийбиттэрин кэннэ аҕабыыттар турбаларын үрбүттэрэ, оттон Иисус хамаандалаабыта:

— Хаһыытааҥ!

Бары куоластарын муҥунан хаһыытаабыттара. Ол хаһыыттан куорат эркинэ дьигиһийбитэ, улахан таастар тоороттон түһэн барбыттара уонна, сотору буолаат, баараҕай эркин сууллан лүһүгүр гыммыта. Раав дьиэтин аттынааҕы эрэ сиринэн эркин сороҕо ордубута.

Израиль сэрииһиттэрэ сонно тута куоракка тоҕо анньан киирбиттэрэ уонна олус түргэнник куораты ылбыттара.

Эрэннэрбиттэрин курдук, Раавка уонна дьиэ кэргэнигэр көмөлөһөргө Иисус Навин эрдэ куораты чуҥнуу сылдьыбыт уолаттары соруйбута. Эдэр уолаттар кинилэри булан, Израиль норуота тохтообут сиригэр Галгалга илдьибиттэрэ. Оттон Иерихон бүтүннүү урусхалламмыта.