Алтан моҕой

Израиль норуота кумах куйаар устун уһуннук мэскэйдэммитэ. Сороҕор кинилэр Ханаан сиригэр чугаһыыллара даҕаны, былыт атын өттүгэр эргийэн, ону батыһан эмиэ иччитэх куйаарга төннөн кэлэллэрэ. Онтон наһаа хомойоллоро, тоҕо диэтэр, кинилэр эрэннэриллибит сирдэригэр тиийиэхтэрин олус баҕараллара. Өскөтүн еврейдэр иччитэх куйаарга сылдьан үҥсэргээбэтэхтэрэ эбитэ буоллар, Айыы Тойон кинилэри Ханаан сиригэр былыр үйэҕэ киллэрбит буолуо этэ. Ону баара Таҥара кинилэри накаастаан өссө да тиэрдэ илигэ.

Биир күн кинилэр эмиэ Таҥара уонна Моисей утары өрө турбуттара:

— Тоҕо эһиги биһигини Египеттэн таһаарбыккытый? Бу иччитэх куйаарга аччыктаан өлүөхпүт. Манна килиэп да, уу да суох, оттон халлаантан түһэр мааннаттан хал буоллубут.

Ити иһин Таҥара еврейдэргэ ыарахан накаастабылы — дьааттаах моҕойдору ыыппыта. Бу моҕойдорго тиктэрэн элбэх киһи өлбүтэ.

Израиль норуота кэмсинэн Моисейга кэлбитэ:

— Таҥара уонна эн утары бараммыт биһиги аньыыны оҥордубут. Биһигини моҕойдортон өрүһүйэрин туһугар Таҥараттан көрдөс эрэ.

Моисей норуотун туһугар үҥпүтэ. Ону Таҥара истэн киниэхэ эппитэ:

— Алтан тимиринэн моҕойдо оҥор уонна маска ыйаа. Моҕойго тиктэрбиттэр бу алтан моҕойу көрдөххүтүнэ, тыыннаах хаалыаххыт диэн норуоккар эт.

Моҕойго тиктэрбит дьон бары, ханна да сырытталлар, алтан моҕойу көрөр кыахтаахтара. Алтан моҕойу көрдөллөр эрэ ыарыылара сүтүөхтээҕэ, доруобуйалара тупсуохтааҕа, өһүллүбүт күүстэрэ киириэхтээҕэ. Таҥараны итэҕэйэн, алтан моҕойу көрбүт еврейдэр ыарыыттан үтүөрбүттэрэ уонна Таҥараны айхаллаабыттара. Хомойуох иһин, үтүөрэр туһугар алтан моҕойу көрөллөрө эрэ ирдэнэрин сорохтор итэҕэйбэтэхтэрэ. Итэҕэйбэт дьон алтан моҕойу көрбөттөрө, ол иһин өлөллөрө. Дьиҥэ алтан моҕой буолбакка, Таҥара олохторун быыһыыра! Дьон итэҕэйиэхтэрин уонна Кини быыһыыр ньыматын ылыныахтарын эрэ наада этэ.