Чуҥнааччылар

— Бу кырдьык баай сир эбит, — диэбитэ Иисус Навин.

Моисей кинини уонна уон биир биистэн биирдии илдьити эрэннэриллибит сири чуҥната ыыппыта.

Түөрт уон күн устата кинилэр ол сири барытын тилийэ кэрийбиттэрэ. Дьэ, ол кэнниттэн дьонноругар-­сэргэлэригэр кэлэн, көрбүт сирдэрэ өлгөм үүнүүлээҕин, киэҥ хонуулардааҕын, тыалардааҕын кэпсээбиттэрэ. Кинилэр виноград сүүмэҕин илдьэ кэлбиттэрэ. Ол сүүмэхтэрэ сүүнэ улахана, икки эр киһи ураҕаска ыйаан аҕалбыттара. Чуҥнааччылар бары биир киһи курдук:

— Ханаан — үүт уонна мүөт сүүрүгүрэр сирэ! — дэспиттэрэ.

Ол кэннэ кинилэр мух-мах барбыттара. Тиһэҕэр кинилэртэн биирдэстэрэ хорсун санаатын киллэрэн эппитэ:

— Моисей, төһө да сир үтүөкэннээҕин иһин, биһиги ол сири кыайан бас билэр кыахпыт суох. Тоҕо диэтэр, онно олорор норуот олус күүстээх эбит!

Атын барсыбыт чуҥнааччылар эмиэ ол сир баараҕай дьоннооҕун, куораттарын тула бөҕөргөтүү үрдүк эркиннээҕин туһунан кэпсээбиттэрэ.

Ону истээт, мустубут дьон абаран-­сатаран барбыттара, кыһыыларыттан Моисейы буруйдаабыттара.

Эмискэ айдаан ортотуттан ким эрэ улахан куолаһа иһиллибитэ. Ол Иуда бииһиттэн чуҥнааччылары кытта барсыбыт Халев этэ.

— Биһиги кинилэри кыайар кыахтаахпыт! — диэбитэ кини. — Миигин итэҕэйиҥ! Туох-ханнык иннинэ Таҥараны итэҕэйиҥ! Кини биһиэхэ ол сири биэриэм диэн эрэннэрбитэ. Кини биһиэхэ көмөлөһүөҕэ!

Иисус Навин Халевы өйөөн:

— Кутталга бэринимэҥ! Куттал хараҕа киэҥ. Таҥара утары эрэ барымаҥ!

Уордаах хаһыылар Иисус Навин уонна Халев саҥаларын быһа түспүттэрэ. Дьон абаран кинилэри истиэхтэрин да баҕарбатахтара. Арай эмискэ бары Ытык Отуу үрдүгэр баар буолбут былыты дьэҥкэтик көрө түспүттэрэ — ити Айыы Тойон килбиэннээх сырдыга скинияҕа тыкпыта.

Сонно тута мустубут дьон чуумпура түспүтэ. Моисей, Таҥара Израиль дьонугар тугу этиэн баҕарарын билээри, Ытык Отууга ыксаабыта.

— Бу норуот Миэхэ итэҕэлэ кэмчитин иһин кинилэри тирии бааһынан суоһарыаҕым! — итинник суостаах этэ Таҥара уурааҕа.

Моисей Таҥараттан норуот аньыытын бу да сырыыга бырастыы гынарыгар көрдөспүтэ.

— Чэ, сөп, — диэбитэ Таҥара, — эн көрдөһөрүҥ иһин Мин бу норуоту имири эһиэм суоҕа. Ол гынан баран, Египеккэ уонна кумах куйаарга Мин оҥорбут дьиктилэрбин көрбүт эрээри, салгыы бэйэтэ билэринэн сылдьыбыт дьон аҕаларыгар эрэннэрбит сирбин көрүөхтэрэ суоҕа. Мин эрэннэрбит сирбэр кинилэр киирэллэрин көҥүллүөм суоҕа!

Норуот түөрт уон сыл устата иччитэх куйаар устун атах балай сылдьыаҕа, ол эрэ кэнниттэн саҥа сири бас билиэҕэ. Ол кэм устата саастаах дьон бары өлүөхтэрэ, арай Иисус Навин уонна Халев эрэ бүгүҥҥү оҕолору кытта Ханааҥҥа киириэхтэрэ.

Ыйытыктар:

1) Саҥа сири чуҥнуу ким барыахтаах этэй? Хаһыа этилэрий? Кинилэртэн икки киһини ааттааҥ.

2) Кинилэр Ханаан сиригэр тугу көрбүттэрий?

3) Маннык быһыы-майгы биһигини туохха үөрэтэрий?