Көмүс оҕус

Моисей элбэх күн устата Синай хайаҕа сылдьан Таҥаралыын кэпсэппитэ. Норуота кини хаһан төннөрүн тэһийбэккэ кэтэспитэ. Ол кэмҥэ тулуйбакка, атын норуоту үтүктэн, бэйэлэрэ сүгүрүйэр таҥараларын оҥосторго санаммыттара. Дьон Ааронтан эмэгэттэ оҥорон кулу диэн салгыар диэри көрдөспүттэрэ. Кини уһугар тиийэн бэриммитэ.

— Сөп! — диэбитэ Аарон. — Мин эһиэхэ таҥараҕытын оҥорон биэриэм!

Аарон норуот баҕатын толороору, Таҥара кэриэһин кэһэрин өйдүүрэ эрээри, барыларын утары барар хорсун санаата суоҕа. Кини дьон биэрбит көмүһүн хомуйан, ону уулларан, кыһыл көмүс оҕуһу оҥорбута.

Оҥоһугун дьоҥҥо көрдөрбүтүгэр бары үөрэ сөхпүттэрэ:

— Бу буолар биһиги таҥарабыт! — дэспиттэрэ.

Моисей Синай хайатыттан түһэн иһэн, дьон өрөгөйдүүр саҥатын истибитэ, көрөөт, туох буолбутун тута өйдөөбүтэ.

— Оо, аньыылаах норуот! Эһиги — дьиҥ итэҕэлэ суоххут! — диэн кылана түспүтэ, хараҕыттан уу-хаар баспыта. Израиль уолаттара сатарыйар суолга үктэнэн, тыыннаах Таҥараларын хаалларан, уулларбыт кутуу оҕуска сүгүрүйэллэр!

Итинник ыарахан аньыыны көрөн, Моисей улаханнык уордайбыта уонна суорба таастары үөһэ көтөҕөн баран, туох баар күүһүнэн, таас хайаҕа үлтү охсубута. Бытарыйбыт таастар лиһигирэһэ түспүттэрэ.

Ол кэннэ Моисей кыһыл көмүс оҕуһу суох гыналларыгар дьаһайбыта.

— Эһиги ыар аньыыны оҥордугут, — диэбитэ кини. — Ол эрээри мин эмиэ хайаҕа тахсыам уонна Таҥараттан эһигини бырастыы гынарыгар көрдөһүөм. Баҕар, Таҥара эһиэхэ өссө төгүл тулуурун көрдөрүөҕэ.

Моисей Синай хайатыгар хат тахсан, Таҥараттан кини норуотун бырастыы гынарыгар көрдөспүтэ:

— Өскөтүн Эн кинилэри бырастыы гыммат буоллаххына, өскөтүн Эн кинилэри имири эһиэххин баҕарар буоллаххына, оччоҕо миигин суох гыммытыҥ ордук!

— Израиль норуотун барытын имири эһиэм суоҕа, Мин буруйдааҕы эрэ накаастыам. Авраамҥа, Исаакка уонна Иаковка анаабыт сирбин бараҥҥыт баһылааҥ, оттон Мин эһигини кытта барсыбаппын, — диэн хардарбыта Таҥара.

— Айыы Тойон, — Моисей көрдөспүтэ, — өскөтүн Эн биһигини кытта барсыбат буоллаххына, мин да норуоппун онно илдьибэппин. Тоҕо диэтэр, Эйигинэ суох биһиги эстэрбитигэр тиийэбит!

— Мин эйигин таптыыбын, Моисей, ол иһин көрдөһүүгүн толоруом. Норуот аньыытын бырастыы гынабын уонна эһигини кытта эрэннэрбит сирбэр барсыаҕым, — диэн хоруйдаабыта Таҥара.

Сотору кэминэн Таҥара Моисейы саҥа икки суорба тааһы оҥороругар уонна онно уон кэриэһи суруйарыгар соруйбута.

Ыйытыктар:

1) Израиль уолаттара эмэгэт оҥорон биэрэригэр кимтэн көрдөспүттэрий?

2) Аарон ханнык кыылы кутан оҥорбутуй?

3) Таҥара норуоту хайыан баҕарбытый?

4) Моисей хайаттан түһэн баран тугу гыммытый?