Халлаантан түһэр килиэп уонна таастан тохтор уу

Израиль норуота кумах куйаарынан баран иһэн дьүүктэ уутугар тохтоон, бэйэлэрин уонна сүөһүлэрин утахтарын ханнарбыттара, пальмалар күлүктэригэр сытан сынньаммыттара. Күүс ылан баран, Син диэн кумах куйаарга салгыы айаннаабыттара.

Египеттэн тахсалларыгар ылбыт кыра өйүө килиэптэрэ бүппүтэ. Дьэ, аны тугунан үссэнэллэр? Дьиҥэ, Израиль дьоно астарын Таҥараттан көрдөстөхтөрүнэ, Кини норуотун аччыктаан өлөргө тиэрдибэтэ биллэр. Таҥара кинилэри таптыыр эбээт. Таҥараҕа эрэнэргэ үөрэммэтэх буолан, Израиль дьоно эмиэ мөҕүттэн барбыттара, Моисейдаах Аарону тиийэн сэмэлээбиттэрэ:

— Эһиги биһигини кумах куйаарга аччыктатан өлөрөөрү аҕалбыт эбиккит! Биһиги Египет сиригэр тото сиир эппит, килиэппит баара. Оо, биһиги онно өлбүппүт быдан ордук буолуо этэ.

Кинилэр Таҥараҕа уонна Моисейга махтанар диэни билбэт дьон этилэр! Ол гынан баран амарах уонна уһун тулуурдаах Айыы Тойон Моисейга эппитэ:

— Норуотум санаатын иһиттим, ас биэриэҕим.

Сарсыҥҥы күнүгэр сарсыарда Израиль дьоно уһуктан отууларыттан тахсыбыттара — сир үп-үрүҥүнэн бүрүллүбүт этэ. Моисей эппитэ:

— Бу баар Таҥара эһиэхэ халлаантан түһэрбит аһа. Хомуйаҥҥыт отуугутугар киллэрэн аһааҥ.

Кинилэр халлаантан түспүт килиэби хомуйан барбыттара, килиэп барыларыгар тиийэрэ. Таҥара бу аһы сарсыарда эрдэ түһэрэрэ, ону күн уота уулларыан иннинэ хомуйа охсуохтаахтара.

— Килиэби хаһаанымаҥ, Таҥара эһиэхэ күн ахсын халлаантан түһэрэ туруоҕа, — диэбитэ Моисей.

Ол да буоллар, сорох дьон, Моисейы истибэккэ, сарсыҥҥы күннэригэр хаһааммыттара. Сарсыныгар хаһааммыт килиэптэрин сиэри гыммыттара — иһэ барыта чиэрбэ буолбут этэ. Барытын быраҕалларыгар эрэ тиийбиттэрэ.

Сотору кэминэн Израиль норуота иһэр уута бүтэн, утатан барбыта. Кумах куйаарга биир даҕаны үрэх, күөл, оннооҕор холуодьас да суоҕа. Таҥара ама кинилэри утатан өлөргө тиэрдиэ этэ дуо? Биллэн турар, суох. Ол да буоллар, кинилэр Таҥараҕа эрэммэккэ, эмиэ Моисейы сэмэлии тиийбиттэрэ.

— Тоҕо эн биһигини Египеттэн таһаарбыккыный? Биһиги оҕолорбутун, сүөһүлэрбитин кумах куйаарга утатан өллүнэр диэн аҕалбытыҥ дуо?

Абаларыттан кинилэр Моисейы тааһынан тамнаан өлөрөргө да бэлэм этилэр. Моисей эмиэ Таҥараттан көрдөһөрүгэр тиийбитэ:

— Бу норуоту хайдах гынабын?

Онуоха Таҥара Моисейга эппитэ:

— Тайах маскын ылан хайаҕа таҕыс, бэйэҕин кытта биир киһини илдьэ бар. Хайа чыпчаалыгар тиийэн, тааһы тайаххынан оҕустаххына, онтон уу сүүрүгүрэн түһүөҕэ.

Моисей Таҥара эппитин курдук тиийэн тааһы охсубута, таастан ыраас, сибиэһэй уу сүүрүгүрэн барбыта. Утатан өлөөрү сылдьар дьоҥҥо хайдахтаах курдук абырал этэй! Дьон куйаастан уостара хатан, тыллара уонна күөмэйдэрэ кууран эрэйдэнэ сылдьан, эмискэ төһө баҕаралларынан уу испиттэрэ, кувшиннарын толорбуттара, сүөһүлэрин уулаппыттара.

Израиль норуота кумах куйаарга сылдьыбытын тухары, төһө да Таҥараҕа эрэммэккэ субу-субу абарбыттарын иһин, Таҥара кинилэри хаһан да хаалларбатаҕа.