Иосиф кулуттааһыҥҥа түбэһиитэ

Биирдэ убайдара хой үөрүн маныы сырыттахтарына, аҕалара Иосифка сорудахтаабыта:

— Хонууга бараҥҥын убайдарыҥ хайдах үлэлии сылдьалларын көр уонна миэхэ кэлэн кэпсээр.

Иосиф аҕатын сорудаҕын куруутун үөрүүнэн толороро. Мааны ырбаахытын кэтэн, аҕатын кытта бырастыылаһан баран айаҥҥа туруммута. Кини өсүөл да, кулут да ылбатаҕа.

Иосиф убайдарын өр көрдөөбүтэ. Биир киһини көрсөн убайдарын ыйыппытыгар, кинилэр ханна баалларын ыйан биэрбитэ. Убайдара Иосиф иһэрин ыраахтан көрбүттэрэ уонна сүбэлэспиттэрэ:

— Улуу түүлдьүппүт ол иһэр, хата, кинини тутан ылан өлөрүөххэ уонна хаспахха быраҕыахха. Оттон аҕатыгар сиэмэх кыыллар тутан сиэбиттэр диэхпит. Дьэ, уонна түүллэрэ хайдах туолалларын көрүөхпүт.

Ону истэн улахан убайдара Рувим кинилэри тохтоппута:

— Кэбис, бырааппыт хаанын тоҕумуоҕуҥ. Ол оннугар куйаар хаспаҕар өлөрбөккө эрэ быраҕыаҕыҥ.

Рувим кэнники кэлэн, быраатын хаспахтан таһааран, аҕатыгар төнүннэрээри итинник эппитэ. Бырааттара сөбүлэспиттэрэ. Иосиф кэлээтин кытта кинилэр саба түһэн тутан ылбыттара, дьэрэкээн таҥаһын устубуттара. Уол онно убайдара тугу гынаары гыналларын сэрэйбитэ. Кини убайдарыттан ааттаһан, иэйэн-­куойан туран ытаабыта даҕаны, кырыктаах сүрэхтээх убайдара истибэтэхтэрэ.

Иосибы дириҥ хаспахха быраҕан кэбиспиттэрэ. Уол сылайан-­элэйэн, хааппыла да уута суох онно сыппыта. Аны тапталлаах аҕатын хаһан да көрбөтүн санаатаҕына, санаата айманара.

Бырааттара ытыырын, ынчыктыырын аахайбакка, убайдара аһаары тэриммиттэрэ. Арай көрбүттэрэ — ыраах караван айаннаан иһэр эбит. Ити атыыһыттар мал-сал атыылаары Египеккэ баран иһэллэрэ. Уолаттартан биирдэстэрэ, Иуда, өй киллэрбитэ:

— Ити атыыһыттар Египеккэ айаннаан иһэллэр, хата, кинилэргэ Иосибы кулут гынан атыылыахха. Оччоҕуна хаанын тоҕуохпут суоҕа уонна кини биһигиттэн ыраах буолуоҕа.

Караван чугаһаабытыгар кинилэр атыыһыттарга эппиттэрэ:

— Биһигиттэн кулутта атыылаһыҥ. Кини уон сэттэ саастаах, үчүгэй көрүҥнээх уол, чэгиэн-­чэбдик, бөҕө-таҕа уол. Египеккэ кинини ыарахан сыанаҕа атыылаһыахтара, оччоҕуна эһиги барыыһырыаххыт.

Уолаттар быанан ороон таһаарбыт уолларын атыыһыттар сыныйан көрбүттэрэ, сүүрбэ үрүҥ көмүс манньыакка атыыласпыттара.

Убайдара буруйдарын биллэримээри, Иосиф ырбаахытын хой хаанынан биһэн баран, аҕаларыгар илдьэн туттарбыттара. Иаков уолун ырбаахытын билэн улаханнык аймаммыта:

— Кырдьык, бу мин уолум ырбаахыта дии! Оҕобун сиэмэх кыыллар тырыта-­хайыта тыыппыттар!

Иаков оҕотун аһыйан хас да күнү быһа тохтообокко ытаабыта, ол эрээри туох да кинини сатаан уоскуппатаҕа…