Иосиф түүллэрэ

Иаков уон икки уоллааҕа. Кинилэр бары улааппыттара. Саамай кыралара Вениамин этэ. Кинини оҕолоноору Иаков кэргэнэ Рахиль өлбүтэ. Рахиль атын уола Иосиф Вениаминнааҕар улахан этэ. Хороччу улаатан эрэр уол аҕатын наһаа таптыыра, кыра эрдэҕиттэн олус истигэн буола улааппыта.

Улахан уон уолаттара хой үөрүн маныыллара. Кинилэр сыыһа-­халты быһыыланалларын көрдөҕүнэ, аҕалара хомойоро. Иосиф убайдарын кытта сылдьан, кинилэр кэмэлдьилэрин көрөн сөбүлээбэтэ уонна аҕатыгар кэлэн кэпсиирэ. Убайдара онтон кыйаханаллара, ол иһин Иосифтыын соччото суохтук сыһыаннаһаллара. Иаков уолаттарыттан барыларыттан Иосибы эрэ ордорон эмиэ сыыһара. Ол барыта түмүллэн улахан уолаттарга өс санааны, ордугурҕааһыны сахпыта.

Биирдэ Иаков Иосифка анаан дьэрэкээн өҥнөөх олус мааны ырбаахы тиктэрбитэ. Маннык таҥас уолаттарга хайаларыгар да суоҕа. Убайдара өссө ордук абарбыттара-­сатарбыттара.

Иосиф сороҕор дьикти түүллэри көрөрө. Ол курдук биирдэ түһээтэҕинэ, кини убайдарын кытта хонууга бурдук түүтэҕин баайа сылдьаллар, арай кини баайбыт түүтэҕэр убайдарын түүтэхтэрэ кэлэн сүгүрүйэллэр. Иосиф ол түүлүн олус дьиктиргээн убайдарыгар кэпсээбитэ.

Ону истэн убайдара олус кыыһырбыттара:

— Эйиэхэ бас бэриниэхпит дии саныыгын дуо?

Сотору кэминэн Иосиф өссө биир түүлү көрбүтэ. Түһээтэҕинэ күн, ый уонна уон биир сулус киниэхэ сүгүрүйэллэр. Ити түүлтэн өссө ордук соһуйбута уонна аҕатыгар, убайдарыгар кэпсээбитэ.

Аҕата кинини мөхпүтэ:

— Ама, эн түүлүҥ этэринэн мин — күн, ийэҥ — ый, оттон ини-биилэриҥ — сулустар буоламмыт эйиэхэ кэлэн сиргэ диэри сүгүрүйэбит дуо?

Ол эрээри Иаков уолун түүлүн өйдөөн хаалбыта. Убайдара өссө ордук кыйахаммыттара, ордугурҕаабыттара:

— Иосиф наһаалаата, бэйэтин аһара үрдүктүк сананар. Дьэ, биһиги киниэхэ өссө көрдөрүөхпүт.

Ыйытыктар:

1) Иаков хас уоллаах этэй?

2) Иаков уолаттарыттан Иосибы ордук күүскэ

таптыыра сөп дуо?

3) Тоҕо Иосиф түүллэрэ убайдарын кыйахаатылар