Ини-биилэр көрсүһүүлэрэ

Иаков дьиэ кэргэнин кытта уһун айаҥҥа туруммуттара. Төһө да айаннара ыараханын иһин, Таҥара Авраамҥа эрэннэрбит сиригэр баран иһэллэриттэн бары сүргэлэрэ көтөҕүллүбүтэ. Иаков бииртэн долгуйаллара — Исав кинилэри хайдах көрсөр. Иаков убайа киниэхэ хайдах курдук өстөммүтүн өйдүүрэ, онон оҕолорун туһугар ордук куттанара.

Киниэхэ утары Исав түөрт сүүс киһилээх иһэрин истэн, Иаков олус уолуйбута. Хайдах буолуохха? Исав иэһин ситиһэр санаалаах буоллаҕына:

— Иаков бүтэр уһуга кэллэҕэ. Киниэхэ элбэх дьахталлардаах, оҕолордоох уонна халыҥ үөрдэрдээх буолан, төттөрү куотар кыаҕа суоҕа, оттон утары киирсиэҕин эр дьоно олус аҕыйаҕа.

Иаков үөрдэрин икки гына араарбыта уонна аҥаарын инники ыыппыта.

«Өскөтүн Исав бастакы барбыттарга саба түстэҕинэ, кини уодаһына-­кырыга намыраабатаҕын билиэҕим. Оччоҕуна саатар үөрүм иккис аҥаарын быыһыам этэ», — диэн Иаков уолаттарыгар быһаарбыта.

Иаков бэйэтэ бастакылары кытта барбыта.

Халлаан хараҥарыыта кини дьонуттан тэйэн, чуумпу сири булан, Таҥараҕа үҥпүтэ:

— Айыы Тойонуом, Эн амарах сыһыаҥҥар уонна алгыскар сөбө суохпун билинэбин. Ол да буоллар миигин уонна дьиэ кэргэммин Исавтан быыһыыргар көрдөһөбүн. Эн миигин көмүскүөх уонна бу сири мин удьуорбар биэриэх буолбутуҥ.

Сарсыҥҥы күнүгэр Иаков отучча тэбиэни үүрдэрэн убайыгар утары ыыппыта. Ол кэнниттэн икки сүүсчэ төбөлөөх хой үөрүн ыыппыта. Онтон салгыы коза, ынах, өсүөл үөрдэрин, бэйэ-бэйэлэриттэн балачча ыраах-­ыраах иһэллэрин курдук, ыыталаабыта. Маны барытын кини убайыгар бэлэх быһыытынан ууммута. «Өскөтүн Исав бэлэх үрдүгэр бэлэх туттаҕына, миигин көрсөрүгэр абарбыта намырыаҕа», — диэн Иаков толкуйдаабыта.

Иаков илдьиттэрин барытын Исавка утары ыыппыта да, убайыттан туох да сурах-­садьык биллибэтэҕэ.

Хараҥаран бары утуйбуттарын кэннэ, түүн ортото, Иаков дьиэ кэргэнин уонна үөрүн куоттаран үрэҕи туораппыта. Бэйэтэ соҕотох бэтэрээ кытылга хаалбытыгар, эмискэ Ким эрэ үрдүгэр саба түспүтэ уонна охсуһан киирэн барбыттара. Ити Ким эрэ киһи бодотун ылбыт Таҥара Аанньала этэ. Кинилэр өр мадьыктаспыттара. Иаков туох баарынан түһүммүтэ. Ити Ким эрэ Иаковы кыайан хоппотун билэн, өттүккэ охсубута. Иаков салгыы охсуһар кыаҕа суоҕа, ол эрээри өстөөҕүн кытаанахтык туппута.

— Халлаан сырдаан эрэр, Миигин ыыт, — диэбитэ утарсааччыта.

Иаков ыһыктыбатаҕа:

— Бастаан миигин алҕаа, — диэбитэ.

— Аатыҥ ким диэний? — Ким эрэ ыйыппыта.

— Иаков диэммин.

— Мантан ыла эн аатыҥ Иаков буолбакка, Израиль диэн буолуоҕа, тоҕо диэтэр, эн Таҥаралыын туһуннуҥ, онон дьону да кыайыаҕыҥ.

— Оттон Эн аатыҥ кимий? — диэн Иаков ыйыппыта, анараата хардарбатаҕа.

Ол кэнниттэн Иаков киһини кытта буолбакка, Таҥаралыын тустубутун уонна Таҥара кинини алҕаабытын өйдөөбүтэ.

Күн тахсыыта биллибэт утарсааччыта сүтэн хаалбыта. Иаков үрэҕи туораан, дьонун сиппитэ. Өттүгэ ыалдьар буолан, доҕолоҥноон хаамара. Дьонун кытта айаннаан иһэн, арай көрбүтэ, ыраахтан кинилэргэ утары эр дьон иһэллэрэ. Ити Исав кулуттарын кытта этэ.

Иаков төһө да долгуйдар, соҕотоҕун кинилэргэ утары барбыта. Убайыгар чугаһаан баран, бас бэринэрин киниэхэ биллэрэн, сэттэтэ сиргэ диэри сүгүрүйбүтэ. Оттон Исав утары сүүрэн кэлэн, кинини кууһан ылан сыллаабыта уонна эппитэ:

— Иаков, эйигин көрөн олус да үөрдүм!

Иаков сүрэҕиттэн таас түспүттүү чэпчээбитэ — Исав аны киниэхэ өстүйбэт эбит! Убайын сүрэҕэ сымнаабытыттан Иаков хайдах курдук үөрбүтэ буолуой?! Таҥара кини көрдөһүүтүн ылыммыт. Иккиэн куустуһан туран үөрүүлэриттэн ытаспыттара.

Исав Рахили, Лияны уонна уолаттары көрөн ыйыппыта:

— Бу кимнээҕий?

— Бу миэхэ Таҥара бэлэхтээбит оҕолоро, — диэбитэ Иаков.

Рахиль, Лия, кулуттар уонна оҕолор бары Исавка сиргэ диэри сүгүрүйбүттэрэ. Убайа Иаковтан ыйыппыта:

— Миэхэ утары тоҕо сүөһү үөрдээх кулуттары ыыппыккыный? Миэхэ сүөһүм-аһым элбэх, үөрдэргин бэйэҕэр хааллар.

— Бэлэхпин ыл. Таҥара миигин өлгөмнүк хадаҕалыыр, билигин миэхэ бары-барыта баар, — диэн көрдөспүтэ Иаков.

Исав бэлэҕи ылбыта уонна быраатын бэйэтин сиригэр ыҥырбыта. Кини олорор сирэ Ханаан сириттэн тэйиччи сытара, оттон Иаков дьоно, сүөһүтэ элбэҕэ бэрт буолан, кыайан батыһар кыахтара суоҕа. Ол иһин Иаков барсыбатаҕа, Иордан өрүһү туораан, Ханаан сиригэр Сихем куорат чугаһыгар олохсуйбута. Кини отууларын туруортаан баран, бэлэх биэрэр сири оҥостон, Айыы Тойоҥҥо махтанан сүгүрүйбүтэ.