Johanes un Petrus komen bie daut Grauf aun

Aum ieeschten Dach von de Wäakj, aus daut noch diesta wia, kjemt Maria Magdalena nom Grauf un sitt dän Steen vom Grauf wajchjenomen. Dan rant see un kjemt no Simon Petrus un no däm aundren Jinja, dän Jesus leef haud, un sajcht to äant: "See haben dän Harn ut daut Grauf wajchjenomen, un wie weeten nich, wua see Am hanjelajcht haben." Dan jinkj Petrus rut un de aundra Jinja, un see kjeemen nom Grauf. De beid oba randen toop, un de aundra Jinja rand veropp, bosja aus Petrus, un kjeem daut ieeschte nom Grauf. Un hee bekjt sikj nenn un sitt daut Lienzeich doa ligjen, hee jinkj oba nich nenn. Dan kjemt Simon Petrus am hinjaraun un jinkj en daut Grauf nenn un sitt daut Lienzeich doa ligjen; un daut Schweetduak, daut om sien Kopp wia, nich biem Lienzeich ligjen, oba biesied, toopjewekjelt, opp eene Städ oppoat. Dan jinkj uk de aundra Jinja nenn, dee daut ieeschte nom Grauf kjeem un sach un jleewd.

Aus see en de Staut trigjkjeem, kjeem Maria Magdalena no Petrus un Johanes, Jesus siene Jinja.

"See haben dän Harn ut däm Grauf jenomen", roopt see ut, "un wie weeten nich, wua see Am hanjelajcht haben!"

See haud kjeene Oninj, daut Jesus en disem Moment läwd, daut Hee von dän Doot oppjestonen wia!

Un natieedlich wieren Petrus un Johanes erstaunt äwa de Norecht. See spooden sikj no de Graufstäd. Johanes rand bosja aus Petrus un errieekjt daut ieeschte Josef von Arimatäa sien Goaden. Hee sach, daut de Steen toom Engank vom Grauf wia wajchjenomen worden.

Hee kjikjt nenn, jinkj oba nich nenn. Daut wia soo sondaboa! De Kjarpa wia nich doa. Bloos de Grauf-Kjleeda lieejen straum toopjelajcht doa. Johanes bleef buten un luad. Petrus kjeem aunjerant un jinkj en daut Grauf nenn. Hee sach krakjt dautselwje: daut Lienzeich, en daut de doodja Kjarpa von Jesus bekjleed wia, un daut Jesecht-Duak auleen, aula toopjelajcht. Wan de doodja Kjarpa jestolen worden wia, soo aus Maria docht, hauden de Deew de Grauf-Kjleeda nich soo ordentlich toopjelajcht trigj jeloten!

Johanes foljd Petrus en daut Grauf nenn. Un dan kjeem am en: Jesus läwd! Doawäajen wia daut Grauf ladich!

Un dan jinjen Petrus un Johanes trigj en de Staut. Dort bestädijden väle von de Jinja un Frues äant, daut see Jesus läwendich jeseenen hauden! De Meaheit von de Jinja un Nofolja, dee om Jesus truaden un roaden, kunnen de frooe Bootschoft nich jleewen.