Jesus ver Pilatus

Dan roopt Pilatus äant wada un wull Jesus loosjäwen. See oba schrieejen doajäajen un säden: "Kjriezich! Kjriezich Am!" Hee oba säd to daut dredde Mol to äant: "Waut haft Hee fa Beeset jedonen? Ekj finj kjeene Schult fa dän Doot aun Am; doawäajen well ekj Am strofen un loosloten." Oba see hilden aun met een ludet Jeschrech un foddaden, daut Hee sull jekjriezicht woaren. Un äa Jeschrech un de Huagepriesta äat neem äwahaunt. Dan uadeeld Pilatus, daut et jedonen wort, soo aus see foddaden, un hee jeef äant dän loos, dee wäajens eenen Opprua un Mort wia em Jefenkjnis jeschmäten worden … Jesus oba äwajeef hee en äaren Wellen.

Aum näakjsten Morjen brochten de Soldoten Jesus ver Pilatus, dän Stalveträda vom reemischen Kjeisa. Hee sull entscheiden, auf see Jesus hanrechten sullen ooda nich. De Menschen drenjden sikj aul ver sienem Paulaust. Pilatus säd lud to de Menschen waut doa vesaumelt wieren: "Dis Maun haft nuscht jedonen, daut Am dän Doot traft. Ekj finj kjeene Schult bie Am. Doawäajen woa ekj Am bestrofen loten un Am dan loosloten."

"Nä, nä!" Breld de Häad. "Kjriezich Am! Kjriezich Am!"

Waut wudd Pilatus doonen? Dise Menschen bedwungen am, Jesus toom Doot to veuadeelen. Oba Pilatus wia sikj soo secha, daut Hee nich schuldich wia. Dan kjeem am eene Iedee en: 'Daut es mood, to de Tiet vom judischen Passafast eenen Jefangnen frie to loten. Wan see sikj tweschen däm Merda Barabas un Jesus entscheiden motten, woaren see woarschienlich Jesus leewa aus am väatrakjen.' Un Pilatus roopt: "Wäm saul ekj dit Joa fa junt frie loten: Jesus ooda Barabas?"

"Barabas, Barabas, Barabas!" Roopten de Menschen.

Jelach wia ut däm Hoff vom Paulaust to hieren. De reemische Soldoten hauden dort äaren Spos doaraun, Jesus to vespotten. Nodäm see Am hauden loten sea veschlonen, fungen see aun, Am to vespotten. See trocken Am eenen oolen Schoarlach-rooden Mauntel aun, aus wan daut een kjennichlicha Mauntel wia, flochten eene Stachelkroon un saden dee opp sien Kopp. Un see vespotten Am un roopten: "Sie jejreest, de Juden äa Kjennich!" Un see vepitschten Am soo sea, daut sien gaunza Kjarpa blad.

Pilatus hopt, daut aul de Spott un de Schläaj, dee Jesus deemootich vedroacht haud, bie de Menschen Metjefeel fa Am wirkjen wudden. Hee leet Am no de Menj rutkomen, oba kjeena bewees irjenteen Metjefeel. De Menj schrieech bloos wieda:

"Kjriezich Am! Kjriezich Am!"

Pilatus sach kjeen Wajch rut. Hee leet sikj eene Komm brinjen, wosch sikj ver daut Volkj siene Henj un säd: "Ekj sie oschuldich aun disen Jerajchten sien Bloot. Daut es june Veauntwuatunk! Ekj woa Am kjriezjen loten, oba sien Bloot woat opp junt sennen!"

Dan leet hee äant Barabas frie un de Soldoten vespotten Jesus wieda.