Petrus velicht Jesus

Un aus see Am jejräpen hauden, fieeden see Am han un brochten Am en daut Hus von däm Huagenpriesta. Petrus oba kjeem von wietauf hinjaraun. Aus see oba medden em Hoff een Fia aunjestekjt hauden, sauten see toop un Petrus saut doa medden mank äant. Doa sach am eene jewesse Deenstmejal biem Fia setten un kjikjt am schoap aun un säd: "Disa wia uk met Am." Hee oba veluach Am un säd: "Fru, ekj kjan Am nich." Un boolt doaropp sach am een aundra un säd: "Du best uk eena von äant." Petrus oba säd: "Mensch, ekj sie et nich." Un no een Stoot, von onjefäa eene Stund, behaupt daut een aundra un säd: "Woarhauftich, disa wia uk met Am …" Petrus oba säd: "Mensch, ekj weet nich, waut du sajchst." Un fuaz, wäarent hee noch räd, kjreid de Hon. Un de Har dreid sikj om un kjikjt Petrus aun. Dan docht Petrus aun däm Harn sien Wuat, woo Hee to am jesajcht haud: "Ea de Hon kjreit, woascht du Mie dreemol velieejen." Un Petrus jinkj rut un hield bettalich.

Daut wia Friedach zemorjes. Jesus wort nom Huagenpriesta jebrocht, dän sien Nomen Kaifas wia. De Metjlieda vom Huagen Rot vesaumelden sikj en sienem Hus, om Jesus to befroagen un Am veuadeelen loten.

Petrus foljd sienem Liera en Enjskje auf. Daut jelunk am, en dän Hoff von daut Hus nenn to komen, wua Jesus sull auf jefroacht woaren. Daut wia kolt. De Deena un Soldoten stekjten medden em Hoff een Fia aun un saden sikj toop, om sikj to woamen, soo sad Petrus sikj met äant toop dol.

"Best du nich eena von Jesus siene Jinja, ooda sie ekj orrajcht en daut?" Säd onverhofs eene Fru, de besied am saut.

"Nä, nä, ekj sie nich", vesechad Petrus ar.

Soo veluach hee Jesus to daut ieeschte Mol, uk wan hee mau korz jesajcht haud, daut hee daut niemols doonen wudd.

Eene Stund wia vegonen, von dan aus Petrus em Hoff jekomen wia. Hee hieed un sach aules, waut sienem Liera wäarent de Vehaundlunk passieed. Hee vestuak sikj en de Menj, wiels hee luaren wull, bat daut Huagenrot-Trafen vebie wia. Een stootje lota kjikjt een Deena no Petrus un säd:

"Uk du wieescht bie Am!"

Petrus auntwuad: "Jesus? Ekj kjan Am nich!"

Soo veluach hee dän Harn toom tweede Mol.

Jrod dan entstunt em Jerechtstow een schrakjelja Jeloarm. See vespataden Am un jreepen Am aun, eenje fungen soogoa aun, Am to schlonen. Een beskje lota säd sestwäa to Petrus: "Secha, du best eena von dee. Diene Utsproakwies verot die!"

Petrus sach, woo ruchullich see met sienem Liera omjinjen, un hee fercht, daut Am dautselwje Schikjsol trafen wudd. Aulsoo säd hee: "Ekj kjan disen Jesus nich!"

Krakjt aus hee dit säd, kjreid een Hon un vekjindicht dän Aunfank von eenem nieen Dach aun.

Dan faul Petrus daut bie, waut Jesus am däm väajen Owent wäarent daut Passafast bie daut Owentmol jesajcht haud: "Vondoag ver de Hon kjreit, woascht du dreemol velieejen, daut du Mie kjanst." Petrus kjikjt no däm Harn, dän hee jrots veloagen haud, un wort en, daut Hee am uk aunkjikjt.

Petrus schämd sikj un wia truarich. Hee spood sikj rut un road bettalich. Hee wudd dän Blekj en däm Harn siene Uagen niemols vejäten.