Daut latste Passafast

Ver daut Passafast oba, aus Jesus wist, daut siene Stund jekomen wia, daut Hee ut dise Welt nom Voda gonen sull. Soo aus Hee de Sienje jeleeft haud, dee en de Welt wieren, leewd Hee äant bat aum Enj. Un wäarent daut Owentkost wia, … läd (Jesus) siene Kjleeda auf, neem een Haunduak un bunk sikj daut om. Doaropp goot Hee Wota en eene Komm, funk aun, de Jinja äare Feet to wauschen… "Wan nu Ekj, de Har un Liera, june Feet jewoschen hab, soo sell jie uk junt unjarenaunda de Feet wauschen. Wiels Ekj hab junt een Biespel jejäft, daut jie uk doonen, soo aus Ekj junt jedonen hab."

Daut Volkj Israel betracht daut Passafast aus daut wichtichste Fast von daut Joa. Un dit Mol wull Jesus daut met siene Jinja toop vebrinjen.

"Wan jie no Jerusalem komen", säd Hee to Petrus un Johanes, "woat junt een Maun bejäajnen, dee eene Wotakruck drajcht. Folcht am en daut Hus nenn un froacht am, wua wie daut Passamol hoolen kjennen. Hee woat junt eene groote Stow wiesen un doa kjenn jie aules reedmoaken."

Un de Jinja deeden, soo aus Jesus äant befolen haud.

Däm Owent vesaumelden see sikj en eene groote Stow met väl Rum en een Hus en Jerusalem. Daut ieeschte sungen see Leeda, soo aus de Mood wia, oba dan deed Jesus waut sea Onjeweenlichet, daut niemols Mood jewast wia. Hee neem de Komm, goot doa waut Wota nenn, kjneed sikj ver eenen von de Jinja un funk aun, am de Feet to wauschen. Nodäm Hee disem Jinja de Feet jewoschen haud, jinkj Hee äwa nom tweeden un dredden … Äare Uagen worden runt von de Äwarauschunk. See wisten nich, waut dit bedied. En de Huach-Beaumte äare Hiesa woschen soo normal de Deena de Jast äare Feet. Oba Jesus wia nich äa Deena! Hee wia de Liera, Gott sien Sän, oba Hee deed de Oabeit von een Deena!

Aus Petrus aun de Rieej wia, leet hee daut nich too: "Mien Har, Du saust mie niemols de Feet wauschen!"

Jesus kjikjt am aun un säd: "Wan du Mie diene Feet nich wauschen latst, woascht du nich to Mie jehieren."

Daut muak Petrus een Stootje denkjen. Daut jinkj nich bloos om, siene Feet to wauschen. Jesus schien noch jratre Wichtichkjeit doaropp to saten.

Nodäm Hee äare Feet jewoschen haud, kjieed Hee trigj no sienem Plauz. "Vesto jie, waut Ekj junt jedonen hab?" Fruach Hee.

De Jinja wieren stell, wiels en Werkjlichkjeit wia äant de Sach aula nich kloa.

"Ekj hab junt een Biespel jejäft", erkjläad Jesus, "daut jie dautselwje doonen sellen."

'Dautselwje doonen? Deena woaren? Jesus wudd je nich werkjlich soont von ons velangen!' Dochten de Jinja.

Jesus räd wieda: "Jie nanen Mie Meista un Har. Un jie sent rajcht, wiels daut es waut Ekj sie. Oba dannoch hab Ekj junt de Feet jewoschen. Wan Ekj dan daut jedonen hab, sell jie krakjt soo doonen. Kjeen Deena es jrata aus sien Har, uk es een Bootschofta nich jrata aus dee, dee am jeschekjt haft. Jie sent miene Deena un Bootschofta. Aulsoo siet nich angst, junem Näakjsten to deenen."

Nu kunnen see met äa Passamol aunfangen. De Jinja brochten daut Äten un luaden doaropp, daut Jesus een Jebäd wudd sajen. Ver daut Jebäd muak Jesus de Jinja noch eenmol jreblen. Hee erinnad äant aun sienen tookjinftjen Doot. "See woaren Mie utlachen un Mie schlonen. Ekj woa hanjerecht woaren. Oba Ekj woa aum dredden Dach wada oppstonen."

De Jinja wieren sea bedrekjt äwa siene Wieed. De Har säd: "Ekj wull dit Passafast sea jieren met junt fieren, ver Ekj lieden mott. Wiels ieescht en de niee Welt fia Ekj daut, daut näakjste Mol, en Gott sien Rikj."

Dan neem Jesus daut Broot un dankt en eenem Jebäd doafäa. Hee bruak daut un jeef daut siene Jinja.

"Dit es mien Kjarpa", säd Hee. "Krakjt soo aus dit Broot jebroaken wort, woat mien Kjarpa fa junt jebroaken woaren. Dit doot to mienem Aundenkjen."

No daut Äten neem Jesus een Kuffel, goot waut Wien doanenn un säd: "Dit es mien Bloot, daut fa junt vegoten woat. Dit es de niea Bunt tweschen Gott un de Menschen."

Hee rieekjt daut Kuffel no däm Jinja dee besied Am saut, un aule Jinja drunken eena nom aundren doarut.

Daut Passamol kjeem noda toom Enj. De Wajch, woo see daut Passafast dit Mol fieeden, wia nich soo, aus see daut jewant wieren. De Jinja vestunden bloos een kjlienet Poat doavon, waut Jesus äant jesajcht haud. Oba om een Stootje wudden see vestonen, waut de Har wäarent daut latste Passafast jesajcht haud.