Maria saulft Jesus en Betanien

Un aus Hee en Betanien en Simon, däm Leprakranken, sien Hus wia un aum Desch saut, kjeem eene Fru, met eene alabasta Buddel voll diere, ajchte Nardeneelj. See bruak de alabasta Buddel entwei un goot Am dee opp sien Kopp. Un eenje worden oajalich... Un see grunsten äwa ar. Jesus oba säd: "Lot ar toch! Wuarom moak jie ar Trubbel? See haft een goodet Woakj aun Mie jedonen."

Sass Doag ver daut Passafast kjeemen Jesus un siene Jinja no Betanien. Soo aus jeweenlich bleef Hee bie de Städ von Marta, Maria un Lazarus. De näakjste Owent besochten see aula Simon dän Leprakranken, dän Jesus jeheelt haud.

Marta bedeend daut Owentkost aum Desch. Oba Maria stunt opp, neem eene alabasta Buddel met eenem dieren Parfum (eene besondre sort von Eelj) un kjeem no Jesus. See bruak väasechtich dän vesechaden Hauls von daut bräakjelje Jefäs auf un goot de Eelj äwa sien Kopp un siene Feet. See leesd äare lange Hoa un wescht Jesus doamet de Feet auf. Daut gaunze Hus wia von daut scheene Jeroch von dise diere Parfum jefelt.

Eenje von de waut doa wieren worden oajalich äwa Maria. Daut wia äant schod, soone diere Saulw to vekwosen. Judas Iskariot, dee lota Jesus veroden wudd, säd: "Wuarom nich dise diere Saulw fa dree-hundat Selwastekja vekjeepen un dee de Oame jäwen?"

Hee säd dit nich, wiels hee soo sea om de Oame bekjemmat wia, oba wäajen hee selfst wia een Deef. Judas druach jeweenlich eene Tausch met daut Jelt, waut de Menschen Jesus jeewen, un soo hilt hee foaken waut fa sikj.

De Har vestieed de Jinja äa Grunsen un säd met ne strenje Stemm: "See haft mie waut Scheenet jedonen! De Oame woa jie emma bie junt haben, oba Mie woa jie nich emma haben! See goot verut Parfum opp mienen Kjarpa, om fa mien Bejrafnis reed to moaken! Un wua emma en de Welt daut Evangelium jeprädicht woat, doa woat uk von daut jerät woaren, waut dise jedonen haft, to äa Aundenkjen!"