De Wätfru äa Opfa

Un Jesus sad sikj dol jäajenäwa däm Gotteskausten un kjikjt woo daut Volkj Jelt en dän Gotteskausten läd. Un väle Rikje läden doa väl nenn. Un doa kjeem eene oame Wätfru un läd twee Koppasch nenn … Un Hee roopt siene Jinja no sikj un säd to äant: "Ekj saj junt woarhauftich: 'Dise oame Wätfru haft mea en dän Gotteskausten nenjelajcht aus aul dee, dee doa enjelajcht haben. Wiels aula haben ut äa Äwafluss enjelajcht; dise oba haft von äare Oamoot aules, waut see haud, äa gaunzet Läwens-Meddel, enjelajcht.'"

Aus Jesus en Jerusalem nenkjeem, jinjen Hee un siene Jinja nom Tempel-Väahoff. Doa saut Hee bie däm Gotteskausten vom Tempel un kjikjt too, woo de Menschen Jelt nenn schmeeten. Hee sach, woo de woolhabenden Juden aufwiesent groote Sommen Jelt enläden, om de Menschen äare Oppmoakjsomkjeit to kjrieejen.

Eene oame Wätfru kjeem un läd twee sea kjliene Jeltstekja en däm Gotteskausten. De Har wist, waut dit Jelt fa de oame Fru meend. Hee roopt siene Jinja no sikj un säd:

"Dise oame Wätfru haft mea en dän Gotteskausten enjelajcht aus aul de aundre Menschen. Wiels see jeewen aula von ut äarem Äwafluss, see oba läd aules en, waut see toom Läwen haud."

Waut passieed, deend de Jinja aus ne goode Lia. Jesus wull äant wiesen, daut, waut bie Gott wichtich es, wia nich woo groot de Gow es, oba daut Hoat von de Person dee doa jeft! Dautselwje sullen see uk doonen, wan see sikj en Tookunft om de Kjoakj kjemren wudden.