Zachäus bejäajent Jesus

Jesus … säd to am: "Zachäus, stie schwind rauf; wiels vondoag mott Ekj en dien Hus bliewen." Un hee stieech schwind rauf, un neem Am opp met Freiden. … Zachäus … säd to däm Harn: "Kjikj, Har! De Halft von miene Jieta jäw ekj de Oame, un wan ekj irjentwäm aufjelaupst hab, däm woa ekj vea mol soo väl trigj jäwen." Jesus oba säd to am: "Vondoag es no dit Hus Radunk jekomen …"

Een bowaschta Takskollakjta met Nomen Zachäus läwd en Jericho. Hee wia een rikja un sea bekaunda Maun. Sien Oabeitsplauz wia fuaz besied de Stautsdäa von Jericho. Zachäus wäld disen Plauz fa ne Uasoak. Derch dise Däa musten de Hendla gonen, wan see en de Staut nenjinjen. Wan see no de Däa kjeemen, wudd hee roopen: "Wach! Kjeena kaun verhäa nengonen, onen de Entretkost to betolen. Laj dien Jelt rut – twee Selwastekja. Daut es de Tax von de reemische Beaumte faustjesat."

Wan de Reisende ieescht, uk onwellich, äa Jelt gauwen, wia Zachäus sea froo. Nich bloos de reemische äa Rikjtum neem too, oba uk sien ieejna. Een Selwastekj jinkj no de reemische Beaumte, daut aundre hilt hee fa sikj.

Jo, hee frinteld väl, oba hee wia nich werkjlich jlekjlich, wiels am kjeena leewd. De mieeschte Menschen hausten am. Fa Zachäus wia daut kjeen Jeheemnis, daut sest kjeena aus hee aun soone Enstalunk schult wia. Siene gaunze Oabeit un de Sort un Wajch, woo hee doamet omjinkj, wia orrajcht.

Een Dach hieed Zachäus eenje Menschen sajen, daut Jesus sea boolt no Jericho komen wudd. "Jesus?"

Fuaz wort hee nieschierich. 'Jesus! Ekj well Am uk seenen, wiels Hee sea beriemt es. Aula sajen, daut dis Jesus de Menschen werkjlich leeft. Oba nä, secha leeft Hee mie nich', docht Zachäus. 'Kjeena leeft mie. Oba ekj wudd dannoch jleichen Am to seenen.'

Zachäus leet siene Deena de Oabeit doonen un jinkj no de Gaus, woa jedocht wort Jesus komen wudd. Oba doa wieren aul soo väl Menschen, dee aula doaropp luaden, Jesus to seenen! Wiels Zachäus kjlien wia, kunn hee Jesus äwa de Menj nich seenen.

Oba waut kunn Zachäus doonen? Om to seenen, waut doa passieren deed, muss hee huach jenuach klautren kjennen. Hee sach een Boom doa dichtbie un wort sikj eenich, doanopp to klautren. Aus de Menschen sagen, woo de väaschta Takskollakjta opp dän Boom klautad, lachten de Menschen am ut. Oba Zachäus jeef nich acht opp äant. Hee wull Jesus seenen. Aul daut Aundre wie am eendoont.

Un doa wia Hee. Hee kjeem vebie, bejleit von siene twalw Jinja. Väle Menschen foljden äant. Zachäus beoobacht sea jeneiw, woo de Menj unja däm Boom vebie jinkj...

Oba Jesus jinkj am nich bloos vebie! Hee bleef krakjt unja däm Boom stonen, kjikjt nopp un säd lud:

"Zachäus, komm fuaz rauf. Vondoag woa Ekj die en dienem Hus besieekjen!"

'Mie? Von wua kjant Hee mie?' Zachäus wia zimlich äwarauscht. 'Un wuarom well Hee no mien Hus komen?'

Oba hee haud kjeene Tiet, lang no to denkjen. Zachäus spood sikj rauf un neem Jesus met no sien Hus. Hee bestald, fuaz eene Moltiet reed to moaken un dän Desch met daut baste Äten waut mäajlich opp to saten. Hee wia soo froo, Jesus entlich perseenlich to trafen. Hee wia sikj nu secha, daut aules, waut see von Jesus vetalt hauden, wia soo. Hee leewd aule Menschen, soogoa soona aus Zachäus, däm siene Läwens-Wies aulem bekaunt wia.

Daut jeef eene groote Veendrunk en Zachäus sien Hoat. Aus hee met Jesus räd, erkjand hee, daut sien gaunzet Läwen von Sind besudelt wia, un deed Busse. Aus de Meddach-Tiet to Enj jinkj, vespruak Zachäus Jesus: "Ekj woa de Halft von mien Hab un Goot de Oame jäwen. Un wan ekj irjentwäm to väl auf jefoddat hab, tol ekj dän vea mol de Somm trigj."

Zachäus wia soo froo, daut Jesus am besieekjen deed. Nodäm hee Jesus bejäajent haud funk de Takskollakjta een nieet Läwen aun. Nu wia daut sien eensja Wensch, daut to doonen, waut Gott von am wull.

Väle von de Menschen, dee Jesus nofoljden un sagen, daut Hee Zachäus besieekjen deed, kjritisieeden Am.

"Wuarom deed Jesus soonen Maun besieekjen? Wie räden nich eemol met däm Läajna. Un doch well niemols irjentwäa met am aun eenem Desch setten. Oba Jesus besieekjt am un nich ons", grunsten see.

Jesus wort sea foaken orrajcht vestonen.

Oba de Har säd to Zachäus:

"Vondoag es daut Heil en dien Hus jekomen! Nu best du jerat un jehieescht to Gott siene Menschen. Ekj sie no de Welt jekomen, aundre Sinda soo aus die to sieekjen un to raden!"