Jesus wakjt Lazarus von däm Doot

Doa wia oba eena krank, Lazarus von Betanien, en daut Darp von Maria un äare Sesta Marta. Doawäajen schekjten de Sestren no Jesus un leeten Am sajen: "Har, kjikj, dän Du leefst, dee es krank." Aus Jesus daut hieed, säd Hee: "Dise Krankheit es nich toom Doot, oba fa Gott siene Harlichkjeit, daut Gott sien Sän doaderch veharlicht woat."

Lazarus, de Brooda von Marta un Maria ut Betanien, wort schwoa krank. Siene Sestren wieren angst, hee wudd stoawen, un schekjten Jesus de Norecht: "Har! Dien Frint es sea krank."

De Har wist daut, oba wia nich besorcht doaräwa. Hee auntwuad: "Dise Krankheit woat nich met däm Doot een Enj nämen. Dee es to Gott siene Iea!"

Jesus bleef noch twee Doag bie däm Plauz, wua Hee wia, aus Hee de Norecht von Lazarus siene Krankheit kjrieech. Un dan säd Hee: "Lot ons gonen! Ons Frint Lazarus es enjeschlopen; oba Ekj go dort han, om am opptowakjen."

De Jinja wieren sikj nich secha, waut Hee jesajcht haud, un Jesus erkjläad: "Lazarus es doot! Oba Ekj sie froo om junt haulwen, daut Ekj nich doa wia, om daut jie kjennen jleewen. Lot ons no am gonen!"

Aus de Har no Betanien kjeem, wia Lazarus aul vea Doag em Grauf. Daut Darp wia voll, wiels väle Juden von ut Jerusalem un de Omjäwunk jekomen wieren, om Marta un Maria to treesten.

Aus Marta hieed, daut Jesus komen deed, jinkj see rut Am entjäajen. Un Maria bleef Tus.

Marta troff Jesus un säd to Am: "Har! Wan Du wieescht hia jewast, wia mien Brooda nich jestorwen. Oba ekj weet, daut Gott Die uk nu jäwen woat, waut emma Du no frajchst!"

Jesus auntwuad: "Dien Brooda woat wada oppstonen."

"Ekj weet, daut hee aum latsten Dach, aum Dach von daut Jerecht, oppstonen woat", säd Marta.

Jesus säd to ar: "Ekj sie de Opparstonunk un daut Läwen. Wäa aun Mie jleeft, woat niemols stoawen. Jleefst du daut?"

"Jo Har! Ekj jleew, daut Du de Christus best, Gott sien Sän, dee en de Welt komen woat", auntwuad de Fru. See spood sikj no Hus, om äare Sesta to sajen, daut Jesus jekomen wia un luad no ar.

Aus Maria hieed, waut äare Sesta säd, stunt see bosich opp un jinkj no Jesus. See faul bie siene Feet dol un funk aun to roaren.

Jesus sach, woo betriept jieda eena wia un fruach deep jerieet, wua de Doodja Maun wia hanjelajcht worden. Aus Am de Plauz jewäsen wort, kjeem Hee nom Grauf un Am rolden de Tronen. Dan befool Hee, dän Steen vom Engank von de Heel, en dee Lazarus lieech, wajchtonämen. Een poa Menschen rolden dän Steen wajch. Dan kjikjt de Har nopp un säd: "Voda! Ekj dank Die, daut Du Mie jehieet hast."

Un Hee roopt met lude Stemm: "Lazarus, komm rut!"

Un dan passieed daut Ommäajelje! De doodja Maun kjeem rut! Hee haud Dooden-Loakes romm siene Henj un Feet jewekjelt un een Zeich romm sien Jesecht jebungen. Jesus säd: "Wekjelt am loos un lot am gonen!"

Väle von de Juden, dee daut groote Wunda beläwden, jleewden aun dän Harn Jesus.