Jesus säajent de Kjinja

See brochten oba uk de Kjinjakjes no Am, daut Hee dee aunschieren sull. Oba aus de Jinja daut sagen schullen see äant. Oba Jesus roopt dee no sikj un säd: "Lot de kjliene Kjinja no mie komen, un wäat äant nich, wiels von soone es daut Rikj Gottes."

Daut wia eent von de Doag, aus de Menschen sikj om Jesus drenjden. Hee vetald von Gott un Gott sien Rikj, beauntwuad jeduldich aule hanwiesende- un Fang-Froagen von de Jesazen-Lierasch un heeld ontalboa väle Kranke. Eene groote Häad Menschen vesaumelden sikj romm Am. Oba doa wia noch eene aundre Grupp Menschen, dee no Jesus jinjen – Mana un Frues met Kjinja.

"Wacht een bät", säd wäa en de Menj to äant, "wua sent jie wajch han?"

"Wie wellen Jesus seenen", auntwuad eene Fru. "Un Am bedden, onse Kjinja to säajnen."

"Kjinja!" Roopt eena von dee, dee doa Stunt, veachtlich ut. "Haft Jesus nich Wichtjret to doonen, aus sikj met june Kjinja drock moaken? See jie nich de Kranke, dee doa luaren, jeheelt to woaren? Kjenn jie Am nich äwa iernste Dinja räden hieren – äwa Gott sien Rikj? Un jie, jie komen häa met june Kjinja, soogoa met de Niejebuarne, dee kjeene Oninj doavon haben!"

"See brucken nich aules vestonen, oba see kjennen vestonen, daut Gott äant leeft. Doawäajen mucht ekj Jesus bedden …"

"Daut es nich soo aus, daut Hee kostboare Tiet aun Kjinja veschwenden woat!"

"Bitte, lot ons derch!"

De Unjahoolunk wort zimlich heet. Jesus bemoakjt de Menschen doa strieden un säd: "Lot de kjliene Kjinja no Mie komen! Gott sien Rikj jehieet to soone aus dit!"

De Jinja kjikjten Jesus äwarauscht aun. De jlekjliche Elren met Kjinja traumpelden derch de Menj, om Jesus to seenen. De Jinja feelden sikj derchenaunda un kjeemen noda, om to seenen, waut doa passieren wudd.

Jesus dreid sikj no äant un säd: "Woarhauftich, Ekj saj junt, wäa Gott sien Rikj nich soo aus een kjlienet Kjint aunnemt, woat doa niemols nenkomen. Wäa emma Gott siene Leew nich soo vetruensvoll aus een Kjint nemt, kaun daut nich kjrieen."

Doahinja neem Jesus de kjliene Kjinja en siene Oarms un säajend äant eenem no däm aundren. Hee säajend uk de elre Kjinja un läd äant de Henj opp.