Jesus en Betanien

Un daut passieed, aus see (Jesus un siene Jinja) wieda reisden, daut Hee en een jewesset Darp nenkjeem; un eene jewesse Fru, met Nomen Marta, neem Am en äa Hus opp. Un see haud eene Sesta, dee Maria heet, dee saut bie Jesus siene Feet un horcht siene Räd too.

Jiedatsmol, wan Jesus no Jerusalem kjeem, besocht Hee een kjlienet Darp Betanien, waut eenje Miel auf von de Staut wia. Dort bleef Hee jeweenlich en Maria, Marta un äarem Brooda Lazarus äa Hus, dee siene Frind un Aunhenja wieren.

Een Dach, aus Jesus soo aus jeweenlich no äant kjeem, horcht Maria too, woo Hee prädijd, wäarent Marta koaken deed. See haud väl to doonen, aulsoo kjeem see no een Stootje no Jesus un säd veoajat: "Mien Har! Sitst du daut fa rajcht, daut miene Sesta mie de gaunze Oabeit auleen doonen lat? Saj ar, see saul mie halpen!"

Jesus schull ar leeftolich un säd: "Marta, Marta! Du moakst die Sorjen un best ontofräd äwa väle Dinja, oba bloos eent es needich! Maria haft daut Bätre jewält, un daut woat ar nich wajchjenomen woaren."

Waut meend de groota Liera? Hee wull Marta un aul de aundre daut biebrinjen, daut see sullen opp daut waut daut Wichtichste wia acht jäwen. Noarunk fa de Seel es väl wichtja aus Noarunk fa dän Kjarpa. Maria wist daut un Marta nich. Ons Läwen opp de Ieed es bejrenst, wäarent de Gloowen aun Christus Jesus ons niemols jenomen woaren kaun. Un dit es daut Baste fa ons. Natieedlich bediet daut nich, daut wie de dachdäachelje Bejäwenheiten von ons Läwen vesiemen sullen. Jieda eena haft siene ieejne Ziels un Oppgowen. Oba de däachliche Probleemen sullen nich äwahaunt von de jeistliche Waustiet haben, soo aus daut bie Marta de Faul wia. To de Moment wia ar daut Äten väl wichtja aus daut, waut de Har prädijd.