Jesus heelt eene kranke Fru

… aus Hee han jinkj, drenjden Am de Volkjshäaden. Un eene Fru, dee aul twalw Joa met eenem Blootfluss wia, dee aul äa Hab-un-goot aun Doktasch vebrukt haud, un kunn von kjeenem jeheelt woaren, kjeem von hinjen un schieed dän Soom von sien Kjleet aun; un fuaz bleef äa Blootfluss stonen. Hee oba säd to ar: "Sie jetroost, Dochta, dien Gloowen haft die jeheelt; go han en Fräden!"

Aus Jesus met daut Boot no Kapernaum trigj kaum, luad dort eene groote häad Menschen no Am. De Menschen jinjen am hinjaraun derch de enje Gaussen von de Staut. Jesus funk daut soogoa schwoa to gonen, wiels de Menj sikj soo om Am drenjd.

Onverhofs bleef de Har stonen, dreid sikj om un fruach:

"Wäa haft miene Kjleeda aunjeschieet?"

Hee moakjt, daut Krauft von Am rutjegonen wia. De Jinja wieren äwarauscht un säden:

"Liera! Du sitst, woo de Menschen sikj drenjen un jäajen Die drekjen. Un doch frajchst Du: 'Wäa haft mie aunjeschieet?'"

Jesus jeef äant kjeene Auntwuat, oba socht wieda no däm, dee Am aunjeschieet haud.

Mank dee, dee Jesus nofoljden, wia eene kranke Fru. Twalw Joa wia see von väle Doktasch behaundelt worden un haud äa gaunzet Jelt utjejäft, om äant to betolen, oba nuscht halpt. Un dan hieed see von de Wundasch, dee Jesus jedonen haud, un kjeem no Am, om jeheelt to woaren. Om daut Hee ar nich sach, nodad see sikj no Am un docht bie sikj: 'Wan ekj bloos siene Kjleeda aunschia, woa ekj jeheelt sennen!' De Fru haud vollet Vetruen en siene Fäichkjeit, ar to heelen! Un aus see eenmol dän Rock-Soom von däm Grooten Liera aunschieed, feeld see fuaz, daut see jeheelt wia.

Sechalich wist Jesus, wäa Am aunschieed. Oba Hee velangd, daut de Fru Moot foten un daut lud rutsajen wudd. Un daut deed see!

See zettad ut Angst un kjeem ver Am, faul Am ver de Feet un vetald Am aules. De Auntwuat, dee see von Jesus hieed, wia voll Leew:

"Miene Dochta, dien Gloowen haft die jeheelt. Go en Fräden!"