De Storm opp de See

Un daut passieed aun eent von dee Doag, daut Hee en een Schepp stieech met siene Jinja; un Hee säd to äant: Lot ons äwa foaren no de aundre Sied See. Un see fuaren auf. Un wäarent see säajelden, schleep Hee en. Dan kjeem een Wintstorm opp de See, un daut Schepp feld met Wota, un see wieren enne Jefoa. Un see kjeemen un wuaken Am opp un säden: Liera, Liera, wie komen om! Dan stunt Hee opp un beschwicht dän Wint un de Wota Walen; un dee läden sikj, un daut wort ruich. Hee oba säd to äant: "Wua es jun Gloowen?"

Een Owent lieed Jesus de Menschen, waut doa vesaumelt wieren aum Eewa von de See Genezaret, om Am aun to hieren. Aus hee foadich wia, säd Hee to siene Jinja: "Lot ons äwa foaren no de aundre Sied von dise See."

De Jinja muaken daut Boot reed, saden sikj met Jesus en daut Boot dol un muaken sikj opp dän Wajch.

Daut wia een langa Dach un Jesus wia sea meed, aulsoo schleep Hee hinjen en daut Boot en, om sikj een beskje to vereiwen. Onverhofs troffen see een grausoma Storm aun. Daut wia opp de See Genezaret nich waut framdet. De Walen kjeemen äwa daut Boot, soo daut et meist äwaschwamt wort. See wieren en groote Jefoa. De Jinja, veenjst, wuaken Jesus opp: "Meista, es Die daut eendoont, auf wie vedrinkjen?"

Jesus stunt opp. Hee sach de toobende Walen, hieed dän Wint julen, späad, woo daut Boot derch de Krauft von de Walen han un häa jeschlakst wort. Hee befool däm Storm:

"Stell! Sie ruich!"

De Storm läd sikj plazlich un daut Wota wort soo glaut aus een Spieejel.

Daut wia een Wunda! De Jinja wisten daut gaunz kloa, daut Storms jeweenlich niemols en eenem Nu opphieren un Walen sikj emma langsom berujen. Oba dautmol wia daut Mäa plazlich doot stell jeworden! Soo waut hauden de Jinja noch niemols ea jeseenen. Oba de Har fruach: "Wuarom sent jie soo angst? Wua es jun Gloowen, jie Kjliengloowsche?"

De Jinja fruagen sikj veenjst un vewundat: "Wäa es dit? Soogoa de Wint un de Walen jehorchen Am!"

See hauden eene Sach nich vestonen, waut haud sult derchem Gloowen aunjenomen worden. Un dise Sach wia de Tautsach, daut äa Liera uk Gott sien Sän wia.