Jesus wakjt de Wätfru äa Sän opp

Aus Hee (Jesus) noda no de Stautspuat kjeem, kjikj, doa druagen see eenen Dooden rut, dee een eensja Sän wia von siene Mutta, un see wia eene Wätfru; un väl Volkj ut de Staut jinkj met ar. Un aus de Har ar sach, jaumad Am daut äwa ar, un Hee säd to ar: "Hiel nich!" Un Hee kjeem doa han un schieed daut Soakj aun, … un Hee säd: "Junga Maun, Ekj saj die, sto opp!" Un de Doodja recht sikj opp un funk aun to räden. Un Hee jeef am no siene Mutta.

Jesus muak sikj opp dän Wajch no eene aundre Staut en Galiläa met Nomen Nain. Väle Menschen jinjen Am hinjaraun. Aus see sikj de Stautsdäa nodaden, sagen see aula eene Trua-Jesalschoft ut de Staut no äant opp too komen. De Soakj-Droagasch druagen eenen jestorwnen Maun, un eene truarende Fru jinkj hinja äant. Väle Menschen von ut de Staut jinjen met ar, om äa Metjefeel to bewiesen. De Fru wia eene Wätfru, un de Doodja wia äa eensja Sän.

Aus Jesus sach, woo jaumalich un ojjlekjlich de Fru wia, haud Hee Metjefeel met äa un säd:

"Doo nich roaren!"

De Karawan hilt stell, un Jesus kjeem no daut Soakj, schieed daut aun un säd to däm Doodjen:

"Junga Maun, Ekj saj die, sto opp!"

De Doodja saut opp un funk aun to räden. Een Wunda passieed! Jesus jeef dän Sän trigj no siene Mutta! Eenen Moment wieren see aula stell un en groote Angst, oba dan roopten see fa Freid un säden aula tojlikj: "Een groota Profeet es unja ons oppjekomen! Gott haft sien Volkj besocht!"

Daut Volkj bäd dän Gott von Israel aun un lowden Am. De Berecht äwa daut Wunda vespreed sikj bosich en gaunz Judäa.