Jesus heelt eenen Maun met Lepra-Krankheit

Un daut passieed, aus Hee en eene von de Städa wia, kjikj, doa wia een Maun voll Leprakrankheit. Aus dee Jesus sach, foll hee opp sien Jesecht un prachad Am un säd: "Har, wan Du west, kaust Du mie reinjen." Un Hee strakjt siene Haunt ut, schieed am aun un säd: "Ekj well, sie jereinicht!" Un fuaz veleet am de Leprakrankheit.

Wäarent sien effentlichen Deenst, muss Jesus väl reisen. Wäarent Hee veschiedne Darpa un Städa besieekjen deed, troff Hee väle schwake un kranke Menschen un heeld äant. Eene sea schlemme onheelboare Krankheit met Nomen Lepra wia to dise Tiet em oolen Palestina sea bekaunt. Daut wia eene äwaschlonende Hutkrankheit.

Een Dach kjeem Jesus bejleit von siene Jinja en eene Staut en Galiläa un bejäajend doa eenem Leprakranken. De oama Maun rand no Am, faul opp siene Kjneees un prachad Am: "Har! Wan Du west, kaust Du mie heelen un rein moaken!"

Woo deep mott sienen Vetruen en Jesus jewast sennen!

De Har schieed dän Kranken aun un säd: "Ekj sie wellich. Sie rein!"

Daut wia nich bloos Jesus sien Wunsch, daut wia Gott sien Befäl. Kjeena buta Gott wudd sikj daut woagen, soo waut to sajen!

Un dan passieed een Wunda: De Leprakrankheit wia wajch. De Maun wia besondasch froo, wiels siene Hut wia nu gaunz rein. De gaunz jesunda Maun stunt ver Jesus.

De Har wull, daut de Maun äwa de Heelunk stell bleef. Hee säd to am, hee sull gonen un sikj däm Priesta wiesen un daut Opfa fa siene Reinjunk opfren, soo aus daut em Jesaz jeschräwen stunt.

Oba hee kunn daut nich enhoolen. Un emma mea Menschen kjeemen, om Am to hieren un von äare Krankheiten jeheelt to woaren.