De ieeschte Reinjunk vom Tempel

Un de Juden äa Passafast wia dichtbie, un Jesus jinkj nopp no Jerusalem. Un Hee funk en däm Tempel, dee doa Ossen un Schop un Duwen vekoften, un de Jeltwakjsla doa setten. Un Hee muak eene Pitsch von Benja, un juach äant aula ut däm Tempel rut, un de Schop, un de Ossen, un veschedd de Jeltwakjsla äa Jelt, un stelpt de Deschen om. Un Hee säd to dee, waut Duwen vekoften: "Nämt dise Dinja hia wajch; moakt nich mien Voda sien Hus to een Moakjt Hus."

Jesus jinkj met de Jinja, siene Breeda un Maria no Kapernaum un bleef dort. Kapernaum wia eent von de kjliene Howen aum See Genezaret. No eenje Doag en Kapernaum kjeem Jesus no Jerusalem, wiels daut meist Tiet fa daut judische Passafast wia.

De Menschen drenjden sikj en de Tempel-Häwa. Em Tempel wieren nich bloos Menschen tojäajen, dee doa kjeemen, om wäarent daut Fast to bäden un Opfagowen to brinjen, oba uk Menschen, dee doa kjeemen, om doa to schachren.

De Har Jesus wia oajalich äwa aule Hendla un Jeltwakjslasch, dee von de Menschen Nutzen neemen, dee toom Fast kjeemen. De Tempelplauz wia to eenem Moakjt jemoakt. Daut Volkj haud kjeene Acht opp Gott sien Hus.

De Har hoof eenje Strälen vonne Ieed opp, muak eene Pitsch doarut, un dreef de Hendla met de Schop un Oss ut däm Tempel, endäm Hee de Pitsch rom pitschd. To dee, waut Duwen vekoften, säd Hee:

"Moakt nich mien Voda sien Hus to een Moakjt-Hus!"

Onen Froagen veleeten de Hendla dän Tempel. De Jeltwakjslasch jeewen sikj to de Vollmacht vom Harn han. Hee schmeet de Deschen met Jeltstekja om un dee vestreiden äwa de Tempel-Häwa. De Lied wieren äwarauscht, aus see sagen, waut Jesus deed, wuagen sikj oba nich, Am opp to hoolen.