Daut Wunda bie Kana

Un aum dredden Dach wia eene Kjast en Kana von Galiläa; un Jesus siene Mutta wia doa. Un uk Jesus un siene Jinja wieren to de Kjast enjelot… Disen Aunfank von Wundatieekjens deed Jesus en Kana von Galiläa un openboad siene Harlichkjeit; un siene Jinja jleewden aun Am.

Aum dredde Dach, nodäm Jesus un siene Jinja no Galiläa jekomen wieren, wia doa en daut kjliene Darp Kana eene Kjast. Uk Maria, Jesus siene Mutta, wia doabie.

Daut wia een scheenet Fast; de Jast eeten un drunken, lachten un vetalden Jeschichten. Jesus un siene Frind wieren uk doa. Oba onverhofs, medden en daut Fast, kjeem Maria oppjeräacht no Jesus un fuscheld to Am: "Ons es de Wien aula jeworden."

Waut fa ne Schaund! De Menschen wudden woarschienlich dän Briegaum fa jiezich hoolen! Maria hopt, Jesus wudd weeten, waut see doonen kunnen. Oba Hee wist, waut siene Mutta von Am wull. Hee auntwuad: "Fru, wuarom deist du mie met dit vebinjen? Miene Stund es noch nich jekomen."

Maria vestunt, waut de Har säd. See jleewd, daut et nuscht jeef, waut Hee nich doonen kunn. Doawäajen kjeem see no de Deena un säd leis: "Wan mien Sän junt irjentwaut sajcht, doot, waut emma Hee junt sajcht."

Un no een stootje kjeem Jesus no de Deena. Aus Hee sikj romkjikjt, bemoakjt Hee sass groote ladje Ieed-Krucken.

"Felt de Krucken met Wota!" Säd Hee to de Deena.

Daut wia ne groote Oabeit, aule sass Krucken bat aum Raunt to Fellen.

"Lot dän Gaustwieet daut schmakjen", säd Jesus.

De Deena kjikjten Am aun. Waut säd Hee? Wull Hee werkjlich, daut de Gaustwieet daut Wota schmakjen sull, waut see jrots ut däm Borm jeholt hauden? Wull dis junga Maun von Nazaret sikj met am Spos moaken? Oba dan dochten see doaraun, waut Maria to äant jesajcht haud, un worden sikj eenich, daut to doonen, waut äant jesajcht wort.

De Gaustwieet kjeem doahan, schapt waut von däm Enhault von de Krucken un neem eenen Schluks.

"Äj", brummeld hee gootmeenent un spood sikj nom Briegaum.

"Du hast een scheenet Fast aunjestalt", säd hee, "oba trotzdäm uk eenen Fäla jemoakt."

De Briegaum docht: "Hee woat mie väahoolen, daut ekj nich jenuach Wien vesorcht hab", un kjikjt schuchta no de Flua.

Oba waut de Fastmeista säd, wia eene gaunz aundre Sach:

"Daut es Mood, daut ieeschte dän basten Wien rut to brinjen un dan dän biljren Wien, nodäm de Jast to väl jedrunken haben. Un du hast gaunz daut Jäajendeel jedonen. De Wien, dän diene Deena nu jrod utdeelen, es von de hechste Wieet!"

De Briegaum wist nich, waut daut aules meend. Maria, Jesus siene Mutta, kjikjt Am frintlich aun un siene Jinja dochten: "Gott selfst haft Jesus jeschekjt, om de Menschen to halpen."