Jesus siene ieeschte Jinja

Aum näakjsten Dach stunt Johanes wada doa un twee von siene Jinja. Aus hee Jesus sach gonen, säd hee: "Kjikj, daut Laum Gottes!" Un de twee Jinja hieeden am räden, un foljden Jesus no. Andreas, Simon Petrus sien Brooda, wia eena von de twee, dee Johanes jehieet hauden, un wieren Am no jefolcht. Dee finjt daut ieeschte sienen ieejnen Brooda Simon un säd to am: Wie haben dän Messias jefungen (daut meent äwasat: De Jesaulwda).

Een Dach, nodäm Johanes de Deepa to de Menschen äwa dän Harn jeprädicht haud, kjeem Jesus wada no dän Jordan-Riefa. Johanes de Deepa räd doa met twee von siene Jinja, Andreas un Johanes. Aus Johanes bemoakjt, daut Jesus vebie jinkj, wees hee no Am un säd:

"Kjikj, daut Laum Gottes!"

Met dit sagen, muak hee daut kloa, daut Andreas un Johanes nich am foljen sullen, oba Jesus, dee een bätra Liera fa äant sennen wudd. Johanes un Andreas fungen aun, däm Harn to foljen. Oba Jesus kjikjt sikj om, sach äant Am hinjaraun komen un säd to äant:

"Waut well jie?"

See säden to Am: "Liera! Wua wonst Du?"

Jesus auntwuad: "Komt un kjikjt!"

Johanes un Andreas foljden Jesus, jinjen en daut Hus nenn, wua Hee wond, un bleewen doa dän gaunzen Owent. Woo ermootjent daut wia, met Jesus to räden! Kjeena haud jeemols soo deep un leeftolich met äant jerät aus waut de Har Jesus deed.

Andreas haud eenen Brooda Simon. See wonden met äarem Voda en de kjliene Staut Betsaida aum See Genezaret. See wieren aula Fescha. Andreas socht sienen Brooda opp, om am uk von Jesus to vetalen.

"Wie haben Christus dän Messias jefungen!" Roopt hee freidich ut, aus hee Simon sach.

Andreas schluach väa, daut hee uk sull gonen un Jesus trafen. Simon stemd aul wellich to. Aus Jesus Simon bejäajend säd Hee to am:

"Du best Simon, Jona sien Sän. Oba du saust Kefas jenant woaren, waut "Steen" (Petrus) bediet."

Waut Simon sea äwarauscht, wia de Tautsach, daut de Har Am noch niemols verhäa jeseenen haud, oba aul sienen Nomen kjand. Aus Jesus Simon dän nieen Nomen jeef, wist Hee, daut ut disem eefachen Fescha en eene korta Tiet een groota Kjoakjen-Leida woaren wudd, soo stoakj un faust aus een Steen.