Jesus woat en de Wieste vesocht

Jesus oba, voll vom Heiljen Jeist, kjeem vom Jordan trigj un wort vom Jeist en de Wiltnis jefieet.

De Diewel es emma de oajchsta Fient jäajen Gott un sienen Sän jewast. Jesus Christus jinkj en eenen ruchloosen Kaumf jäajen am. Aus Jesus, nodäm Hee dän Befäl vom himlischen Voda em Jordan-Riefa jekjräajen haud, sienen Deenst aunfunk, funk de Kaumf aun. No Gott sienem Wellen, wort Jesus vom Heiljen Jeist en de Wiltnis jefieet, wua Hee met däm Diewel jäajenäwa to stonen komen sull!

Jesus faust fa vieetich Doag un vieetich Nacht en de Wiltnis. Hee eet nuscht un drunk kjeen Wota wäarent aul dee Doag.

De Vesieekja – de Diewel, dee de Menschen bestendich moakt Sindjen – kjeem dichtbie no Jesus. Hee plond, Jesus hinjarem Licht to fieren, nu, wua Hee wäajen dän Hunga meist bat doa wia en de Onmacht to faulen. Hee docht, wan Jesus eene Sind bejinkj, wia hee niemols en de Loag, de Sinden von aundre Menschen opp sikj to nämen. Däm Diewel sien Ziel wia, de Menschen de Radunk vollstendich fuat to stälen.

Un de Diewel säd:

"Wan Du Gott sien Sän best, dan saj to disem Steen, daut dee to Broot woat!"

Oba Jesus auntwuad: "De Mensch läft nich auleen von Broot, oba von jieda Wuat von Gott."

Daut kunn de Diewel nich vestrieden. Dan vesocht hee noch wada, Christus auf to proowen. Hee fieed Jesus opp eenen huagen Boajch, wees am aule Kjennichrikjs von de Welt un äare Scheenheit un säd prauzich:

"Wan du ver mie opp de Kjnee felst un mie aunbätst, saul dit aules dient sennen."

Doaropp auntwuad Jesus:

"Go hinja Mie, Soton! Wiels daut steit jeschräwen: 'Du saust dän Harn, dienen Gott, aunbäden un Am auleen deenen!'"

Doahinja brocht de Diewel Jesus no Jerusalem, muak Am opp däm huagen Dak vom Tempel stonen un räd met zocka-seete Wieed to Am:

"Wan Du Gott sien Sän best, dan schmiet Die von hia rauf. Wiels daut steit jeschräwen: 'Hee woat siene Enjel befälen äwa Die, daut see Die bewoaren, un see woaren Die opp de Henj droagen, daut Du dienen Foot nich aun eenen Steen steeten woascht.'"

De Har Jesus wull nich met däm Vesieekja strieden, dee de Schreft orrajcht brukt un faulsch utläd. Hee auntwuad met de Wieed von de Schreft:

"Du saust dän Harn, dienen Gott, nich vesieekjen."

Un de Diewel, besiejd, veleet Jesus.