Jesus un siene Famielje

Daut Kjint oba woss un wort stoakj em Jeist, jefelt met Weisheit, un Gott siene Jnod wia opp Am … Un Jesus neem too aun Weisheit, Ella un Jnod bie Gott un de Menschen.

Jesus woss en Josef sien Hus en Nazaret opp. Aus Hee twalw wort, neemen Josef un Maria Am met no Jerusalem, om daut Passafast to fieren.

Jieda Joa fieeden de Juden daut Passafast un kjikjten jieren väarewajch opp de Heljedoag. Eenje von äant äwanaumen lange, meadoagje Reisen, om no Jerusalem to komen, wua see met aundre Juden ut veschiedne Lenda aun de Tempel-Fasten deelnämen wudden. Dort bäden see dän Gott aun, dee sien Volkj leewd un äant soo foaken holp. Aula wieren schaftich, un Kjinja, dee daut latste Joa twalw Joa oolt jeworden wieren, freiden sikj besondasch. Wiels see durwen toom ieeschte Mol en äarem Läwen aun daut Fast deelnämen.

Ditmol neemen Maria un Josef Jesus met un jinjen toop met äare Nobasch no Jerusalem. Waut Hee wäarent de Reis sach un hieed, wia toom staunen! Opp däm Wajch no Jerusalem bejäajenden see väle intressaunte Dinja. Oba woo de Staut sach äwatroff aule Jedanken! De scheena Tempel un dusende Stemmen... Jesus intressieed sikj besondasch doafäa, woo de Tempel-Deensten aufjehoolen worden. Siene Elren erkjläaden Am omstendich de Bediedunk von de Jewanheiten un Tradizieonen.

Daut Fast dieed säwen Doag. Dan wia daut Tiet fa de Pilja, sikj opp dän Trigjwajch to moaken. Maria un Josef sochten no äaren Sän, kunnen Am oba nich finjen. See dochten, Hee haud sikj veleicht met äare Nobasch toop opp dän Trigjwajch jemoakt, wiels Hee daut soo jewant wia, bie äant to sennen. Soo muaken see sikj kjeene groote Sorjen un reisden wieda. Bat zeowes hauden see de aundre Pilja ut Nazaret enjeholt. Woo veenjst wieren Jesus siene Elren, aus sikj daut rutstald, daut Hee nich bie äant wia! Waut sullen see nu doonen?

See musten trigj no Jerusalem gonen! See sochten no Am aulewäajen un fruagen jieda Framden, auf see eenen twalw-joaschen Jung jeseenen hauden. Väle von de Menschen de vebie jinjen hauden Junges en disem Ella jeseenen, oba wia daut dee, dän see sochten? See wisten äwahaupt nich, wua Hee wia.

Josef un Maria wieren sea besorcht. Äare Angst wia groot. Schlieslich worden see sikj eenich, en de Tempel-Häw no to seenen, wua de Lierasch soo jeweenlich huach-jelieede Unjahoolungen äwa de Schreft hauden. See veluaren meist de Hopninj, Am doa to finjen. Waut kunn Hee unja de Jelieede to doonen haben? Hee wudd nich väl von äare Unjahoolunk vestonen un secha wudd Am de Tiet doa lank woaren.

Oba daut wia äwahaupt nich de Faul; Krakjt em Tempel fungen see äaren Sän. Maria un Josef kunnen äare Uagen un Uaren nich jleewen. Jesus stald de Jesazen-Lierasch sea schwieeje Froagen, dee see afens beauntwuaten kunnen. Aus see Am selfst waut fruagen, jeef Hee äant sea weise Auntwuaten. De Jesazen-Lierasch scheddaden äwarauscht dän Kopp. See wieren vewundat un erstaunt äwa disen Jung siene Weisheit.

Ut Freid un Erleichtrunk omoarmden de Elren äaren Sän. Oba dan schull Maria Am: "Wua best Du jewast? Wie haben soo lang no Die jesocht!"

Jesus auntwuad, "Ekj wia de gaunze Tiet hia. Wist jie nich, daut Ekj hia en mienem himlischen Voda sien Hus sennen muss?"

Nich Josef uk nich Maria vestunden, waut Hee äant säd. See neemen äaren Sän un jinjen trigj no Nazaret.

Jesus wort von Joa to Joa weisa. Hee leewd siene Elren un jehorcht äant, aus de näakjste achtieen Joa vejinjen. Maria, siene Mutta, behilt de Wieed, dee Jesus jesajcht haud, aus see Am em Tempel fungen. See docht emma wada äwa dise Wieed no.