Daniel aum Hoff vom Kjennich Darius

Aul de Präsidenten von daut Rikj, de Gowernia, de Prinzen, de Rotjäwa, un de Volkjsleida, haben sikj vereenicht om eene Veordnunk vom Kjennich opp to rechten un eenen strenjen Baun, daut, wan irjentwäa een Jebäd moakt to irjent Gott ooda Mensch, buta die, Oo Kjennich, fa dartich Doag; dee saul en daut Loch met Leiws jeschmäten woaren. Aus nu Daniel wist daut de Schreft unjaschräwen wia, jinkj hee en sien Hus nenn ... un hee foll opp siene Kjneeen dree mol dän Dach, bäd, un dankt ver sienem Gott, soo aus ea.

Kjennich Kierus rejieed daut niee Kjennichrikj von de Meeda un Persa un muak Darius toom Meeda-Kjennich von Babelon. Darius bestemd 120 Jebiet Harscha, dee äwa daut gaunze Kjennichrikj rejieren sullen. Dree Äwasechta worden noch äwa dee bestemt, om dän Fräd to hoolen un äwa Dinja to woaken, un Daniel wia eena von äant.

Kjennich Darius schazt Daniel sea, oba doa wieren eenje Menschen aum kjennichlichen Hoff, dee äwa Daniel sien Erfolch aufjenstich wieren. See kjeemen met eenem beesen Plon opp, om Daniel loos to woaren. Een Dach kjeemen see nom Kjennich un säden to am:

"Mucht Kjennich Darius eewich läwen! Du best een majchtja Kjennich, goot un jenstich. Jieda eena läft derch diene Boarmherzichkjeit. Oba väle weeten daut nich. Wie haben doaräwa nojedocht, woo wie dise Norecht äwa diene Boarmherzichkjeit wiet un breet vespreeden kjennen. Du motst eenen Befäl rutjäwen, daut et kjeenem erlaupt es, wäarent de näakjste Moonat eenen Gott ooda Mensch buta die om Jnod to bedden. Bloos von die doaf jeemaunt irjentwaut velangen. Un dan woat jieda eena dietlich seenen, woo groot diene Boarmherzichkjeit es."

"Daut es eene goode Iedee", stemd de Kjennich to, jeschmeichelt von aules, waut see säden. "Ekj woa daut Jesaz unjaschriewen. Un wäa daut brakjt, saul en daut Loch met de Leiws jeschmäten woaren."