Belsazar sien Fast

En dämselwjen Uagenblekj kjeemen Finjasch väa von eene Menschenhaunt un schreewen aun de Plostawaunt, von däm Kjennich siene Paulaust, de Laump jäajenäwa. De Kjennich sach de Haunt, dee doa schreef.

No Nebukadnezar sien Doot wort Belsazar Kjennich von Babelon. Hee bestemd siene Tiet to däm Vejnieejen un de Fast.

Aus de Staut Babelon beloagat wort, hilt de Kjennich en sienem Paulaust een grootet Gaustjebott auf. Dusende von siene Haren kjeemen toom fasten un de Wien schäld riew. Nodäm hee bedrunken wia, befool Belsazar, de selwane un goldne Jefässa nenn to brinjen, doamet see doarut drinkjen kunnen. Dit wieren de Jefässa, dee Belsazar sien Voda Nebukadnezar ut däm Tempel en Jerusalem jenomen haud, aus dise von de Babelonia jeplindat wort. Belshazzar un sien Volkj drunken ut dise Jefässa un preisden äare Jetta un äare Macht, wiels see dochten, de Jetta sent majchtich jenuach, om äant to beschitzen.

Oba onverhofs wort et dootstell en de groote Stow. De Kjennich un siene Menschen kjikjten vegrult no de Plostawaunt vom Paulaust. Doa wia eene menschliche Haunt, dee onbekaunde Wieed doaraun schreef. Oba kjeena kunn läsen ooda erkjläaren, waut doa jeschräwen stunt. De Kjennich wort blaus un siene Kjneeen fungen aun to zetren. Hee wist de jeneiwe Bediedunk von de Schreft noch nich, oba hee haud daut Jefeel, daut nuscht Goodet doaraun wia.

Hee roopt lud, om de Zaubra un Hakjsenmeistasch von Babelon to brinjen. Kjennich Belsazar vespruak äant eene rikje Beloonunk fa de Schreft läsen, oba kjeena wia em Vemieejen daut to doonen. Dan säd am siene Mutta, de Kjennijin, daut et eenen Maun em Kjennichrikj jeef, dee dän Jeist vom heiljen Gott en sikj haud. Sien Nomen wia Daniel. To jane Tiet, haud Kjennich Nebukadnezar selfst am toom Äwahaupt von aule Weisen en sien Kjennichrikj bestemt.

Aus Daniel ver Belsazar jebrocht wort, fruach de Kjennich:

"Ekj hab jehieet, daut Gott sien Jeist en die es un du Weisheit un Ensecht hast. Aule Weisen von Babelon kunnen mie nich de Bediedunk von dee Enschreft erkjläaren. Wan du kaust, woascht du rikj beloont woaren."

Oba Daniel auntwuad: "Du kaust diene Gowen fa die hoolen un diene Beloonungen sestwäm jäwen. Ekj woa de Schreft fa die läsen un die sajen, waut dee bediet."

Daniel räd wieda: "Gott es aulmajchtich äwa aule Kjennichs un Kjennichrikjs opp Ieeden. Oba du, Belsazar, hast dien Hoat nich ver däm Harn jedeemooticht. Oba en dienem Stolt un diene Enbilnis drunken du un diene Aumtslied un diene Frues Wien ut de Jefässa vom Tempel vom Harn. Du hast de Jetta von Selwa un Golt, von Holt un Steen jeloft, dee nich seenen uk nich hieren kjennen. Oba du hast dän Gott nich jeieet, dee die daut Läwen jejäft haft un aule diene Wäaj en siene Haunt helt. Doawäajen schekjt Hee de Haunt, dee dise Wieed schreef: mene, mene, tekel, parsin. Hia es, waut dise Wieed bedieden. Gott haft de Doag von diene Harschoft jetalt un dee aufjeschloten. Du wortst opp de Wichtschol jewoagen un fa to leicht befungen. Dien Kjennichrikj es jedeelt un no de Meeda un Persa jejäft."

En de selwje Nacht wort Belsazar doot jemoakt un Babelon vom persischen Kjennich Kierus enjenomen. Soo wia daut groote Kjennichrikj von Babelon nich mea.