De brennenda Owen

Schadrach, Meschach, un Abed-Nego auntwuaden un säden toom Kjennich: "Oo Nebukadnezar … ons Gott däm wie deenen, kaun ons von däm brennenden Fia-Owen raden, un hee woat ons ut diene Haunt, Oo Kjennich, raden."

Sea boolt vegaut Kjennich Nebukadnezar, daut de Gott von Daniel de eensich woara Gott wia. Hee leet eene goldne Jestault moaken un oppstalen, om daut de Menschen dee aunbäden wudden. Een groosoatjet Toopkomen wort jeplont un väle Menschen wieren enjelot, uk Daniel siene Frind. Doa wort bekaunt jemoakt, daut aula sullen hanfaulen un daut Jestault aunbäden, wan de Musikj aunfunk, un wäa nich jehorcht, wudd en eenen flaumenden Owen jeschmäten woaren.

Daut Fast funk aun, de Musikj funk aun, aula kjneeden sikj dol un bäden daut goldne Bilt aun. Aula buta de dree junge Juden. De Deena malden däm Kjennich daut aun. Nebukadnezar wia sea doll. Hee schekjt fa de junge Mana un boot äant eene Wol aun:

"Nu, entwäda jie faulen dol un bäden daut Bilt aun ooda jie woaren en eenen brennenden Fia-Owen jeschmäten! Un woon Gott woat junt dan ut miene Haunt raden kjennen?"

Oba Schadrach, Meschach un Abed-Nego säden toom Kjennich:

"De Gott, däm wie deenen, kaun ons doavon un uk von diene Haunt raden. Oba selfst wan hee ons nich raden well, woaren wie nich diene Jetta deenen ooda daut goldne Bilt aunbäden, daut du oppjestalt hast."

Aus Auntwuat doaropp befool Nebukadnezar, dän Owen säwenmol heeta aus jeweenlich to moaken. Dan befool hee waut von de stoakjste Soldoten von siene Armee, de junge Mana to binjen un äant en dän jlieejenden Owen to schmieten. De Owen wia soo heet, daut de Fia-Flaumen de Soldoten dootmuaken, dee Schadrach, Meschach un Abed-Nego no de Däa vom Owen leiden. Soo follen de dree junge Mana jebunjen en dän jlieejenden Fia-Owen nenn. De Kjennich beoobacht daut un to siene groote Äwarauschunk un Angst sach hee waut em Owen, daut hee sikj nich erkjläaren kunn. De Kjennich stunt schwind opp un fruach siene Beroda:

"Wieren doa nich dree Mana, dee wie jebunjen un en dän Owen jeschmäten haben?"

"Secha!" Säden see.

"Oba ekj see vea Mana em Fia romgonen, läwendich un onvelazt! Un doa es noch eena, de vieeda, un am sitt soo aus de Sän von Gott", brummeld Nebukadnezar.

Hee rand nom Owen un roopt:

"Schadrach, Meschach un Abed-Nego, däm aulahechsten Gott siene Deena! Komt doa rut! Komt häa!"

Dan kjeemen de dree ut daut Fia un nodaden sikj no däm Kjennich. De kjennichliche Rotjäwa sagen, daut daut Fia nich een eensje Hoa opp äarem Kopp tonicht jemoakt haud, uk äa Auntrakjtich wia nich vesenjt, un doa wia kjeen Fia-Jeroch aun äant. Daut wia een woaret Wunda, wiels selfst de stoakjste Soldoten storwen bloos von ver de Opninj von däm Owen jekomen to sennen.

Nebukadnezar muss aunerkjanen, daut de Gott, dän de junge Juden aunbäden, aulmajchtich wia. Hee erkjläad: "Mucht de Gott von Schadrach, Meschach un Abed-Nego jeloft sennen, dee sienen Enjel jeschekjt un siene Deena jerat haft, dee opp Am vetruden. See wieren reed leewa äa Läwen opp to jäwen, aus irjent eenem Gott to deenen ooda am aun to bäden, buta äarem ieejnen Gott!"

Nebukadnezar jeef de dree Frind äare Tietels un Väarajchten trigj, soo daut see väl Iea kjrieejen.