Daniel un siene Frind

Oba Daniel neem sikj en sien Hoat väa, sikj nich to veonreinjen met däm Kjennich sien Äten un met däm Wien, dän hee drunk, un foddad von däm Väaschten von de Eunuchs (een Deena), daut hee sikj nich veonreinjen mucht. Un Gott jeef, daut de Väaschta von de Eunuchs Daniel gootmeenent un boarmherzich wia.

Oppem Hoff vom Kjennich Nebukadnezar läwden waut judische junge Mana. See wieren Nokomen von kjennichliche Famieljes. De Kjennich haud eenen besondren Plon fa äant. Hee wort sikj eenich, de junge Mana dree Joa de chaldäische Sproak un Wissenschoft to unjarechten, doamet see en de Tookunft siene Rotjäwa woaren wudden. Äare Nomes wieren Daniel, Hananja, Mischael un Asarja. Oba om aules loos to woaren, waut äant aun äare judische Häakunft erinren kunn, kjrieejen see niee Nomes: Beltschazar, Schadrach, Meschach un Abed-Nego.

Wäarent de vea Frind en de Jefangenschoft wieren, jleewden see emma noch un bäden toom Harn. Trotz de Doodesjefoa entschloten see sikj von Aunfank aun, sikj nich met kjennichlichen Äten un Wien to veonreinjen.

Gott säajend de junge Mana fa äaren Moot un äare Truheit un jeef äant Weisheit, Vestentnis, eenen noforschenden Senn un een scheenet Utseenen. Waut Daniel betraft, am wort eene besondre Fäichkjeit jejäft derch dän Jeist von Gott, Dreem un Visionen uttolajen. Een Dach läd hee eenen von Nebukadnezar siene Dreem ut, dän sest kjeena utlajen kunn. De Kjennich wia doaräwa werkjlich erstaunt, oba Daniel erkjläad, daut hee nich de Aunerkjanunk nämen kunn, oba daut et vom Harn wia. Un Nebukadnezar veharlicht dän woaren Gott, dän Gott von Daniel.