De babelonische Vebaununk

To dee Tiet kjeemen Nebukadnezar de Kjennich von Babelon siene Kjnajchts, nopp jäajen Jerusalem un de Staut wort beloagat… hee neem aule Schaza ut däm Tempel vom Harn wajch… Hee brocht uk von Jerusalem de väanämste Menschen vom Launt no Babelon.

Dree-hundat Joa wieren vegonen, von dan aus Kjennich Salomo äwa daut groote un woolhabende Launt rejieed. No sienem Doot spoold sikj daut Kjennichrikj en twee Deelen. Jerusalem bleef de wichtichste Staut. Dort befunk sikj de Paulaust fa dän Kjennich un waut noch wichtja es, uk de von Salomo jebuda Tempel. Daut Launt wia donmols aus Juda bekaunt.

Leida hilden nich de Kjennich uk nich daut Volkj Gott siene Jebooten. See dreiden sikj von Gott wajch un bäden faulsche Jetta un Aufjetta aun. Gott schekjt Profeeten, dee daut Volkj schullen un to de Busse opproopten, oba daut Volkj horcht niemols no äant.

Oba dan kjeem Gott sien Jerecht äwa Israel un de Babelonia äwaneemen daut Launt.

Nebukadnezar, Kjennich von Babelon, wia de Juden äa schlemsta Fient. Met eenmol wia hee met siene Armee en Jerusalem, neem dän Kjennich jefangen, neem aule goldne un selwane Jefässa ut däm Tempel un brocht dee nom Tempel fa eenen heidnischen Gott en Babelon. De Babelonia neemen uk aule Schaza ut däm Tempel un von Salomo sien Paulaust wajch. Nodäm see dän Kjennich sien Paulaust, dän Tempel un aule Hiesa von de aunjeseenste Juden ut de Staut jeplindat hauden, brenden see aules dol.

Junge Mana, däm Kjennich siene Säns un judische Prinzen, säwen-dusent baste judische Soldoten un aule Holtoabeida un Schmäd-Mana worden von Nebukadnezar jefangen jenomen un en de Vebaununk no Babelon wajchjenomen.

Soo worden Jerusalem un Juda to Nebukadnezar siene Unjadonende.

De Har brocht een Jerecht äwa sien jäajenaunschet Volkj dee doa soo sindjen deed. Wäarent de Jefangenschoft sull daut Volkj Israel lieren, daut de Har de eensich woara Gott es un Aufjetta faulsche Jetta sent.