De Zeichnis-Kjist opp däm Boajch Zion

David säd to de gaunze Vesaumlunk von Israel: "Wan junt daut goot schient to sennen un wan daut vom Harn, onsem Gott es… Lot ons de Kjist von ons Gott no ons trigjbrinjen" … De gaunze Vesaumlunk säd, daut dit sull jedonen…

David wort schlieslich een Kjennich, soo aus Gott daut vesproaken haud. Hee wort en Betlehem jebuaren un heed dort Schop, oba aus hee aunfunk to rejieren, trock hee no Jerusalem.

Jerusalem wia eene wunda schmocke Staut. Daut lieech opp atelje Hiejel. Eent von dee heet de Boajch Zion. Opp disem Boajch bud David dän kjennichlichen Paulaust. Hee leewd Gott sea un daut wia de Grunt, wuarom hee dichtbie de Zeichnis-Kjist wull sennen. Un nu wia daut Tiet fa David, de Zeichnis-Kjist doa han to brinjen.

Väle Priestasch jinjen met David. Uk daut Volkj foljd däm Kjennich, sunk Dankleeda to Gott un späld veschiedne Musikj-Instrumenten: U-Hoapen, Trompeeten, Fleeten, Hoapen un Zimbeln. David jinkj met de Menschen toop un späld opp siene Hoap. Hinjen druagen de Leviten de Zeichnis-Kjist.

Woo scheen wia daut! Woo aunjenäm wia daut, de Menschen to hieren, daut see dän Harn lowden! Eene groote Zol Menschen jinkj rut, om de Karawan to bejäajnen. See kunnen hieren, woo David Gott aunbäd un de Hoap späld. Woo froo wia David aun disem Dach!

De Zeichnis-Kjist wort opp dän Boajch Zion jebrocht, dän siene Spetz met Wenj omjäft wia, dee doa Puaten hia un doa hauden. Aus de Karawan noda kjeem, worden de Haupt-Puaten wiet opjemoakt, om daut de Kjennich un de Zeichnis-Kjist nenkomen kunnen. David haud em Verut befolen, eenen besondren Plauz reed to moaken, wua doa runtom Gardienen wia un de Zeichnis-Kjist sull oppjestalt woaren. De Sinjasch sungen daut Lowleet "Loft dän Harn!" daut David toopjestalt haud. Aun disem Dach brocht de Kjennich Gott Opfagowen un säajend daut Volkj Israel opp däm Boajch Zion.

David wia bloos soo froo, daut däm Harn siene Kjist nu dichtbie sien Paulaust stunt. Jieda Dach sungen de Sinjasch Lowensleeda un spälden Musikj ver de Zeichnis-Kjist.

Kjennich David wia nich emma en sienem Paulaust, wiels hee foaken jäajen de Filista un aundre Fiend von Israel kjamfen muss. Oba jieda Mol, wan Gott am un sien Volkj dän Siech äwa de Fiend jeef, kjeem hee nom Boajch Zion trigj un lowd dän Harn fa dän Siech.