De Heel

"Aun disem Dach haben diene Uagen jeseenen, daut de Har die vondoag en de Heel en miene Henj jejäft haft. ...oba mien Uag haft die veschoont; Un ekj säd: 'Ekj woa miene Haunt nich aun mienen Harn lajen, wiels hee es de Jesaulwda vom Harn.'"

Nu muss David bestendich no eenem Plauz sieekjen wua hee secha wia. Wua emma hee kjeem, kjanden see am fuaz un de Norecht von am vespreed sikj wiet un breet. Oba boolt saumelden sikj emma mea Soldoten rom David.

Een Owent sauten see ver eene groote Heel en de Boaj, wua see sikj vestuaken, un sagen, woo eene groote Armee noda kjeem.

"Daut es Saul", säd David. "Hee well mie dootmoaken. Vestäakj junt!"

De Soldoten schlikjten sikj bosich en de Heel nenn, om sikj to vestäakjen. Een Wajchta bleef biem Engank un no een Stootje foljd äant doanenn.

"De Kjennich selfst kjemt hiahäa", säd hee oppjeräacht. "Dit es diene Jeläajenheit, David! Du kaust am dootmoaken! Hee es nu auleen un woat sikj nich wäaren kjennen. Dree-dusent Soldoten woaren sikj die dan unjadon stalen."

"Stell!" Säd David.

Aula wieren stell. See beoobachten doa em Dunklen neiw dän Engank to de Heel. Un dan wees Saul sikj en sienen kjennichlichen Rock.

"Blieft hia!" Säd David leis un schlikjt sikj väasechtich verwoaz.

Hia veschwunk Saul hinja de Kaunt von de Steenwaunt. Aus David no de Kaunt kroop, sach hee eene Akj von Saul sien Rock. David neem sien schoapet Schwieet, schneet dee auf un kjeem onbemoakjt trigj nenn.

"Wuarom hast du Saul nich dootjemoakt?" Fuschelden de Soldoten.

"Hee es de Jesaulwda vom Harn. Ekj woa dän, dän Gott jewält haft, nich dootmoaken", auntwuad David.

"Oba Gott haft am lang trigj veschmäten un die utjewält!"

"Daut stemt", säd David. "De Har woat doafäa sorjen, daut ekj to siene bestemde Tiet de Macht äwanäm. Doawäajen bruck ekj nich de Kontroll doaräwa nämen."

Aula kjikjten no däm Engank. De Kjennich kjeem ut de Heel.

"Blieft hia!" Befool David un foljd am.

Aus hee ut de Dunkelheit von de Heel rutkjeem, sach hee, daut Saul aul met siene Soldoten doa unjen wia.

"Mien Har un mien Kjennich!" Roopt David ut. Hee bekjt sikj läach, om Saul aus Kjennich to ieren. "Wuarom denkjst du, ekj hab de Aufsecht, die Schoden aun to doonen? Ekj haud jrod de Jeläajenheit, die doot to moaken."

Un David hoof de loosjeschnädne Akj vom kjennichlichen Rock huach äwa sienen Kopp. Saul kjikjt veschrocken rauf no sien Rock. Doa wia werkjlich een Stekj aufjeschnäden worden! Saul funk aun to roaren.

"Du best jerajchta aus ekj!" Roopt hee ut un siene Stemm zettad von soo jerieet sennen. "Waut du jedonen hast, haft bewäsen, daut du daut goot met mie meenst, oba ekj hab mie daut Schlajchste von die väajestalt. Ekj weet, daut du vesecha woascht Kjennich sennen. Vespräakj mie, daut du miene Famielje nich doot moaken woascht!"

"Ekj vespräakj die daut!" Roopt David ut.

Saul wia sea jerieet von David siene goode Enstalunk. Hee roopt siene Soldoten no sikj un jeef dän Befäl, David nich mea to vefoljen. De Grupp dreid om un jinkj trigj. Un David stunt doa un kjikjt to, woo see wajch marschieeden.