Saul un David

Saul räd to sienem Sän Jonatan ... daut hee David doot moaken sull; oba Jonatan, Saul sien Sän, haud grootet Jefaulen aun David.

Nodäm hee Goliat besiecht haud, bleef David biem Hoff. Hee durf soogoa met däm Kjennich aum selwjen Desch äten. See hauden lange Unjahoolungen un Saul socht maunchmol soogoa sienen Rot. Äwa de Tiet lieed David dän Omgank met Jewäaren un woss to eenem jeschekjten Kjrieja. Saul un dee opp sienen Hoff leewden aules, waut David säd un deed, soo sea, daut hee tolatst toom Häafiera fa de kjennichliche Armee enjesat wort. Waut krakjt soo wichtich wia fa David to de Tiet wia siene Jemeenschoft met Jonatan, Saul sien Sän, wiels Jonatan wia sien basta Frint.

"Bitte, nemm mien Schwieet, mienen Buagen un mien Schiltkjleet", haud Jonatan no däm Kjrich to am jesajcht, "nemm dit aus een Tieekjen von ons Frintstekj."

Von däm Dach aun worden David un Jonatan sea enje un true Frind, un beid räakjenden äa Frintstekj sea.

Uk de Menschen leewden David. Am wort wiet runtom huachjeacht: Mana, Frues un Kjinja opp de Gaus lowden am, soogoa mea aus Saul. Daut oajad dän Kjennich un muak am sea doll.

Een Dach, aus Saul un David toop eeten, wort de Kjennich wada wuttent. David foot fuaz no de Hoap, om Saul met Musikj to berujen. Oba dit Mol schauft daut nich, wiels David selfst de Uasoak von Saul siene Wutt wia. Hee kunn sikj nich beharschen, dän jungen Maun to seenen ver am setten un de Hoap hoolen. De Kjennich jreep sikj eenen Spies, dee aun de Waunt stunt, un schmeet dän no David. Oba de junga Maun paust sea opp. Hee buach sikj dol, de Spies juach bie sienem Kopp vebie un stuak zetrent en de Waunt. Dit oajad Saul noch mea. Hee jreep no noch eenem Spies, un wan David nich to Sied jehupst wia, haud Saul am doamet doljeschloagen.

"Ekj well David nich mea seenen!" Roopt de Kjennich. "Lot am irjentwua wietauf jäajen de Filista kjamfen!"

Un Saul fercht sikj, wiels hee sach, daut de Har met David wia. Aulsoo schekjt hee David wajch.

Auladinjs hilt Saul sien Vespräakjen, daut hee ver däm Kaumf met Goliat jejäft haud. Siene Dochta Michal wort David siene Fru.

David muss dannoch wajchranen, wiels Jonatan am säd, daut Saul am nich bloos wajchschekjen, oba uk dootmoaken wull.