De junga Hoad

De Har säd to Samuel: "Woo lang west du om Saul truaren, soo ekj am aus Kjennich äwa Israel doch veschmäten hab? Fell dien Huarn met Eelj un go; Ekj schekj die no Isai däm Betlehemita. Wiels Ekj hab Mie eent von siene Säns toom Kjennich vesorcht.

Betlehem wia bloos een kjlienet Darp, äwahaupt kjeen beleewdet Ziel fa Reisende. Oba Gott schekjt Samuel dort han, om eene Famielje to besieekjen. Eena von de Säns ut dee Famielje sull lota een Kjennich von Israel woaren. Isai, de Voda to de Famielje, wia stolt doaropp, Samuel bie sikj em Hus to haben, un hee lood am toom Owentkost en. De Desch wia aul reedjemoakt, aulsoo funk Isai aun, Samuel siene Säns väa to stalen.

"Dit es mien elsta Sän", säd Isai brow.

'Am sitt et uk ierlich soo aus een ajchta Kjennich', docht Samuel. 'Hee es groot un lat schmock, Saul wia daut uk, aus ekj am toom Kjennich saulwd.'

Oba jrod dan hieed Samuel Gott siene Stemm sajen:

"Betracht nich sien Utseenen ooda siene Hecht. De Menschen kjikjen no daut Butalje, oba de Har kjikjt no daut Hoat. Hee woat nich de Kjennich sennen."

Isai stald eena nom aundren von siene säwen Säns väa. Doch jiedat Mol säd Gott: "Dit es nich dee, dän Ekj jewält hab."

"Nu lot ons äten gonen", säd Isai un jinkj no däm Desch.

"Isai, sent diene Säns aula hia?" Fruach Samuel.

"Ekj hab noch een Sän, de jinjsta. Hee deit de Schop oppe Weid heeden."

"Brinj am häa!" Säd Samuel.

David de junga Maun stunt boolt ver Samuel. Am leet et schmock un hee haud scheene Uagen.

Un Gott säd to Samuel:

"Saulw am, dit es dee!"

Samuel neem dän Eelj-Huarn, goot waut Eelj opp dän Jung sien Stiern un säd:

"En Gott sien Nomen saulw ekj die toom Kjennich äwa daut Volkj Israel. Mucht Gott die säajnen!"

Un en disem Moment kjeem de Jeist vom Harn äwa David.

Isai un siene Säns wisten nich waut to sajen soo aus see sikj wundaden, un soogoa David vestunt nich gaunz, waut aun däm Dach met am passieed.

FROAGEN

1) Waut befool Gott daut Samuel sull doonen?

2) Woo väl Säns haud Isai?

3) Wäa wort de jesaulwda Kjennich? Wäm deed Samuel saulwen?