Israel foddat eenen Kjennich

Un de Har säd to Samuel: "Horch no aules waut daut Volkj to die sajcht. See haben nich die veschmäten, oba Mie haben see aus äa Kjennich veschmäten...

Samuel wort sea oolt. Derch de Joaren wia hee de Maun jewast, derch dän Gott de Israeliten rejieed. Hee wia een Rechta, dee Oneenichkjeiten schlichten deed, un een Profeet, dee de Menschen opproopt, Gott to jehorchen. Oba waut de Israeliten wullen, wia eenen Kjennich to haben, soo aus aule aundre Velkja, nich een Rechta.

See kjeemen no Samuel un säden to am:

"Jäw ons eenen Kjennich, dee ons leiden woat!"

Daut muak Samuel sea truarich. Hee funk aun, to Gott to bäden, un Gott beauntwuad daut Jebäd:

"Horch no aules, waut see sajen… see haben nich die veschmäten, oba Mie. See haben Mie aus äaren Kjennich veschmäten."

Dan leet Samuel aule Israeliten toopkomen un säd to äant: "Gott woat junt eenen Kjennich jäwen. Oba dit woat hee aus siene Rajchten un june Flichten am jäajenäwa nämen. Hee woat june Säns moaken, am aus Soldoten to deenen un siene Kjrichwoages to bejleiten. Hee woat eenje von junt moaken, siene Stapen plieejen un siene Arnt enbrinjen, un hee woat aundre doatoo brinjen, Jewäaren un Toobehia fa siene Kjrichwoages to schmäden. Hee woat june Dajchta nämen, om fa am koaken un Broot to baken. Hee woat junt june baste Wiengoades, Stapen un Goades wajchnämen un dee siene Deena jäwen. Een Tieendel von june Arnt woat uk siene Beaumte un Deena jejäft woaren. De baste von june Deena woaren fa am schaufen. Doa woat de Dach komen, aun däm jie junt wenschen woaren, jie hauden nich no eenem Kjennich jefroacht. Jie woaren to Gott schrieen wäajen junen Kjennich, oba de Har woat junt nich auntwuaten.

See horchten nich no daut, waut Samuel säd, oba foddaden wieda:

"Wie wellen, daut een Kjennich äwa ons rejieet!"

Dan befool de Har am, Saul aus Kjennich äwa äant entosaten. Saul wia junk un leet schmock un eenen Kopp jrata aus irjent sestwäa.

De Israeliten freiden sikj sea, am to seenen un roopten: "Lang läw de Kjennich!"

Oba Saul wia nich een gooda Kjennich. Hee deed nich Gott siene Jebooten hoolen. Hee deed bloos, waut hee wull. Doawäajen wull de Har nich, daut siene Nokomen Israel rejieeden. Wäarent Saul siene Harschoft wäld Gott eenen jungen Maun ut, dee doatoo bestemt wia, Gott sien Volkj no Saul sienen Doot, to leiden.