Derch dän Jordan gonen

Dan säd Josua to de Menschen: "Moakt junt rein, wiels morjen woat de Har Wunda mank junt doonen."

Tiedich zemorjes kjeemen Josua un daut gaunze Volkj Israel aun dän Jordan-Riefa. See loagaden aum Eewa vom Riefa un fungen aun sikj reed to moaken, doaräwa to gonen. Josua foddad de Israeliten opp, sikj to reinjen fa Gott, wiels Gott wudd äant een Wunda wiesen.

Aum näakjsten Dach säd de Har to Josua:

"Vondoag woa ekj daut Volkj Israel wiesen, daut ekj met die woa sennen, soo aus ekj met Moses wia. Saj de Priestasch: Wan jie ieescht de Kaunt vom Jordan-Riefa errieekjen, mott jie stelhoolen un em Riefa stonen bliewen."

Josua befool de Priestasch, de Zeichnis-Kjist to nämen un dee to droagen, wäarent see daut Volkj veropp jinjen. Hee säd to äant:

"Vondoag woa jie daut Wunda von Gott seenen un weeten, daut de läwendja Gott mank junt es! De Zeichnis-Kjist woat ver junt en dän Jordan-Riefa nenwanken. Wält twalw Mana von ut aule twalw Stam von Israel, eenen ut jieda Staum. See woaren eene besondre Oppgow kjrieen! Sooboolt see en daut Wota vom Jordan nenstaupen, woat daut Wota aufjeschnäden woaren. Aun eene Sied woat daut schälende Wota stelhoolen un soo aus eene Waunt steil jerecht woaren un aun de aundre Sied woat daut Wota aufranen."

Aus de Priestasch, dee de Zeichnis-Kjist druagen, en dän Riefa nenstieen, hieed daut Wota jäajenstroom vom Riefa onverhofs opp met schälen. Eene groote Wotawaunt formd sikj aun de bowa Sied vom Riefa, wiet wajch von de Städ, wua de Priestasch stunden. Aun de aundre Sied schäld daut Wota wieda, bat daut gaunz wajch wia. Daut jeef doa een breeda Wajch un de Priestasch brochten de Zeichnis-Kjist en de Medd vom Riefa. Dort hilden see stell. Un daut gaunze Volkj Israel jinkj opp drieejem Boddem de Kjist vebie no jantsied Eewa vom Jordan.

De Har befool twalw Mana ut jieda Staum von Israel, eenen Steen ut däm Riefa to nämen, wua de Priestasch stunden, no däm Plauz, aun däm de Menschen von Israel äwanachten. Josua muak ut noch aundre twalw Steena een Denkjmol un stald daut opp däm Boddem em Riefa opp, krakjt doa, wua de Priestasch met de Zeichnis-Kjist stunden.

Aus de gaunze Vesaumlunk daut Eewa aun de aundre Sied vom Jordan errieekjt haud, foljden de Priestasch met de Kjist vom Harn. Soo schwind aus see ut däm Jordan rutkjeemen, kjeem daut Wota rauf un schäld wada delenjd un feld dän Riefa-Boddem, soo aus daut et emma jedonen haud. De Menschen wieren erstaunt äwa daut Wunda, daut Gott jedonen haud. See loagaden sikj en Gilgal, nom Oosten von de Staut Jericho. Dort läd Josua de twalw Steena han, dee de twalw Mana von verhäa metjebrocht hauden, un säd to de Vesaumlunk:

"Wan june Säns junt eenem Dach froagen: 'Waut bedieden dise Steena?' woa jie äant sajen, daut et Wota vom Jordan ver de Zeichnis-Kjist aufjeschnäden wort. Un dise Steena woaren een bliewendet Denkjmol sennen, soo daut aule Menschen oppe Ieed muchten weeten, daut Gott siene Haunt majchtich es un daut jie dän Harn, junen Gott, fa emma ferchten sullen!"