De Siech äwa Jericho

Dan säd de Har to Josua: "Kjikj, ekj hab Jericho toop met sienem Kjennich un siene Kjriejesmana en diene Henj jeleewat …"

Ut Angst fa de Israeliten veschloot daut Volkj von Jericho de Däaren von de Staut. Kjeena jinkj rut un kjeena kjeem nenn.

Gott säd to Josua: "Ekj hab Jericho en diene Haunt jejäft, sienen Kjennich un sien Volkj. Lot diene bewaufnete Mana sass Doag hinjarenaunda romm de Staut marschieren. Un säwen Priestasch sellen säwen Trompeeten ver de Zeichnis-Kjist droagen. Marschieet aum säwenden Dach säwenmol romm de Staut un lot de Priestasch de Trompeeten blosen. Wäarent dise gaunze Tiet doafst du kjeen eensjet Wuat rutkomen loten. Bloos opp dienen Befäl saul daut Volkj eenen Kjriejes-Jeschrech rutjäwen un äare Stemm opphäwen, om daut de Waunt toopbräakjen woat. Dan lot diene Soldoten en de Staut nengonen, jieda von eene aundre Rechtunk."

Josua vetald de Priestasch un Soldoten aules, waut Gott befolen haud. Hee säd uk, daut aul daut Selwa un Golt un aul de Sachen ut Brons un Iesa däm Harn jeweit wieren. Josua woarnd de Menschen, daut see met däm Doot wudden bestroft woaren, wan see irjentwaut von ut de Staut Jericho metneemen.

Daut Volkj Israel deed aules krakjt soo, aus de Har daut befolen haud. Doahinja jinkj de Armee von Israel loos. De säwen Priestasch met de Trompeeten jinjen aulen veropp un de Priestasch met de Zeichnis-Kjist foljden äant. De äwaje von de Israeliten marschieeden un see blosden äare Trompeeten. Josua säd to aulem, see sullen kjeen Wuat sajen, bat hee eenen besondren Befäl jäwen wudd.

Sass Doag marschieeden see stell jieda Dach eenmol romm de Staut. Aum säwenden Dach fungen see tiedich zemorjes aun wada stelles romm de Staut to gonen, bloos de Priestasch blosden de Trompeeten. Aus de säwende Rund romm de Staut vebie wia, blosden de Priestasch de Trompeeten un Josua säd: "Schriet!"

Aule Mana schrieen eenen luden Jeschrech. Fuaz, funk de jewaultje Stautswaunt soo sea aun to schedren, daut groote Steena aunfungen doavon loos to bräakjen un dan aules met eenem luden Krach toopbruak. Bloos een kjlienet Poat von de Waunt bleef äwa: Rahab äa Hus.

En dee Moment jreepen de Israeliten de Staut aun un neemen dee bosich en. Josua befool de beid Spiejoonen, Rahab un äare gaunze Famielje ut de Staut to brinjen, soo aus see ar daut vesproaken hauden. De junge Mana fungen äant un brochten äant no daut Loaga von de Israeliten en Gilgal. Un de Staut Jericho wort gaunz venicht.