Rahab un de Spiejoonen

"Sie stoakj un mootich, wiels du saust dit Volkj daut Launt aus Oafgoot utdeelen, daut ekj äare Vodasch jeschwuaren hab, äant to jäwen. Sie bloos stoakj un sea mootich, daut du doaropp acht jefst, no aule Jesaz no to haundlen, daut Moses, mien Kjnajcht, die jeboden haft. Drei nich doavon no de Rajchte ooda no de linkje Sied, om daut du wua emma du han jeist, gooden Erfolch haben kaust."

Nodäm Moses jestorwen wia, funk Josua aun, daut Volkj Israel reed to moaken daut vesproakne Launt entonämen. Gott vespruak, Josua to halpen, wan hee siene Jebooten hoolen un sikj am unjadon moaken wudd.

"Sie stoakj un mootich", säd Hee to am. "Wiels de Har es met die, wuahan du uk jeist."

Un Josua säd to de Menschen, see sullen äaren Väarot fa dree Doag reedmoaken, wiels see dän Jordan äwagonen wudden. Daut wia daut Launt, daut Gott äant vesproaken haud to jäwen, un doawäajen wort et daut vesproakne Launt jenant.

Josua wia sea väasechtich. Hee wort sikj eenich, twee Spiejoonen rut to schekjen, om daut Launt un besondasch de Staut Jericho to unjasieekjen. De junge Mana jinjen en de Staut nenn un bleewen to Nacht em Hus von eene Fru jenant Rahab. Äa Hus wia een Poat von de Stautswaunt.

De Kjennich von Jericho wort äwa disen Besuach weetenjeloten un befool siene Deena, de Israeliten faust to nämen. Oba Rahab vestuak de Spiejoonen opp daut Dak von äa Hus un säd to däm Kjennich siene Beaumte: "Jo, waut Mana kjeemen no mie. Oba ekj weet nich, wäa see wieren. Aus daut diesta wort, veleeten see. Go äant bosich hinjaraun, jie woaren dee jriepen."

De Kjennich siene Beaumte juagen de Israeliten hinjaraun. Rahab jinkj no äare Jast opp daut Dak un säd:

"Ekj weet, daut Gott junt dit Launt jejäft haft. Aula, dee hia läwen, haben Angst fa junt. Wie haben von daut Wunda jehieet, daut Gott jedonen haft, aus jie ut Ägipten jeflicht sent, un woo daut Wota vom Rooden Mäa ver junt drieech jeworden wia. Wie kjrieejen Angst, wiels de Har, jun Gott, es Gott em Himmel bowen un opp de Ieed unjen. Ekj hab junt Frintlichkjeit bewäsen. Nu vespräakjt mie, daut jie mie un miene Famielje ver däm Doot raden woaren. Jäft mie een sechret Tieekjen, daut jie daut doonen woaren."

De Spiejoonen vespruaken Rahab, daut see un äare Famielje wudden Secha sennen. See halpt äant, met eenem Strank derch daut Fensta rauf to komen. Biem Veloten foddaden de Mana Rahab opp, eenen schoarlach-rooden Strank aun daut Fensta to binjen, derch daut see äant fuatkomen leet. Dit wia een Tieekjen doafäa, daut de gaunze Famielje em Hus aum Läwen bliewen wudd. Doahinja veleeten de Mana de Staut.

See muaken daut secha trigj no Josua un vetalden am aules un muaken äare Jeschicht foadich met dise Wieed:

"De Har haft jewess daut gaunze Launt en onse Henj jejäft, un daut gaunze Volkj vezoacht wäajens ons.