Wota von ut däm Steen

Un de Har räd to Moses un säd: "Nemm dän Stock un vesaumel de Jemeent, du un dien Brooda Aaron, un rät ver äare Uagen to däm Steen, un de woat sien Wota jäwen; un du woascht äant Wota utem Steen rut brinjen un de Jemeent un äa Vee drenkjen."

De Israeliten vebrochten väl Tiet en de Wieste un trocken von eenem Plauz nom aundren. Een Dach kjeemen see no eenem Plauz, wua doa kjeen Wota wia. Aulsoo, waut haben see jedonen? Bäden see Gott aun ooda fungen see aun to grunsen? Leida streeden see met Moses un Aaron, soo aus see emma deeden, wan Gott äant proowd. See säden:

"Wuarom sent wie nich aul ea jestorwen? Wuarom hab jie ons loten ut Ägipten komen, om hia en de Wieste to stoawen? Doa sent kjeene Fiejen, kjeene Wiendruwen, kjeene Frucht un doa es kjeen Wota toom Drinkjen!"

See vegauten, daut de eensje Uasoak, wuarom see noch en de Wieste wieren, wia äa ieejna Mangel aun Gottvetruen. Aus Moses un Aaron äant grunsen hieeden, wieren see sea vestalt. See veleeten de Vesaumlunk, follen met däm Jesecht no rauf bie daut Zelt von de Vesaumlunk un bäden. Boolt räd Gott to äant. Hee säd to Moses: "Nemm dienen Stock un vesaumel daut Volkj. Dan kjemst du no däm Steen, räd to däm un dee woat Wota rut poaschen."

Oba Moses un Aaron wieren sea bossich met daut Volkj. See säden: "Hieet nu, jie Wadaspanstje, sellen wie junt Wota ut disem Steen holen?" Dan hoof Moses siene Haunt un schluach tweemol met sienem Stock opp dän Steen. Un daut Wota poascht rut, soo daut aule Menschen drinkjen un äa Vee drenkjen kunnen.

Soo, wia daut rajcht waut Moses un Aaron deeden? Moses muak atelje Fäla. Hee haud nich sult dän Steen schlonen; hee sull bloos to däm räden! Butadäm beduaden beid Moses un Aaron, daut et Wota ut däm Steen komen wudd.

Oba trotzdäm jeef Gott Wota, om de Menschen siene Boarmherzichkjeit to wiesen. Oba hee stroft Moses un Aaron: "Wiels jie dit jedonen haben, sell jie nich en daut Launt Kanaan nengonen."

Daut wia fa äant beid eene hoade Strof. Moses dreemd foaken doavon, daut vesproakne Launt to seenen, wua Abraham eenen Aultoa bud un Gott aunbäd. Oba no däm, daut passieet wia, sull sien Droom nich woa woaren.

Moses wia sea deemootich, saunftmootja aus aule Menschen opp de Welt. De Israeliten wieren foaken ondankboa un schmeeten Moses Beschuldjungen väa, oba hee auntwuad niemols strenj. Bloos daut eene Mol kunn hee sikj nich beharschen.